Шернур посёлкышто илыше Татьяна ден Александр Токтаровмытын Элика ден Элави ӱдырышт кушкыт. Элика «ныжыл» манмым ончыкта, а Элави – «чулым, чолга». Ӱдыр-влакын койышышт лӱмыштлан лач келшен толыт. Татьянан тукымыштыжо марий лӱман кугезыже-влак ятырын улыт. Паки, Аймалче, Янсипа, Янсуло, Айдогул…
Янсипа кугезе ковашт нерген ятыр фото ден шарнымаш ушештарат. Тудын пӱрымашыжат неле лийын. Янсипа 1910 ийыште шочын, но шочмо кагазым тудлан куд ий гыч гына ыштеныт. Школышто лач ик кече гына тунемын. Аважлан полшаш кӱлын, садлан ӱдыр 12 ияшак колхозышто талгыдым ончаш тӱҥалын.
23 ияш улмыж годым индеш ийлан кугурак Яныбек лӱман рвезылан марлан лектын. Янсипа моткоч моторын мурен. Яныбек тудым кугарня еда клубыш мураш-кушташ шкак колтен. Ик жап гыч Зина ӱдырышт шочын. Сар тӱҥалмек, пелашыже фронтыш каен. Самырык ӱдырамаш Уфа марте имне дене фуражлан коштын. Янсипа Айдогуовна тетла марлан лектын огыл, сар пытымек, вес пӧръеҥ деч ик эргым ыштен. Кова кужу ӱмырым илен, Татьяна ден Леонид кугезе уныкаже-влакым ужын.
Татьянан изаж ден еҥгажын, Леонид ден Ольга Япаевмытын, ешыштышт вич ияш Элесия ӱдырышт кушкеш. Элесия – марий лӱм. Тудо «мудреч, ончыко шонен моштышо» манмым ончыкта.
Теве тыге Япаевмыт тукымышто, кугезе-влакым жаплен, икшывыштлан марий лӱмым пуат.