Илышыште куан ден ойго пырля коштыт манын ойлат. Теве ик палымем денат тыгак лие.
Оля – ошалге чурийвылышан, канде шинчан, кумло ийым эрталше самырык ӱдырамаш. Шыма, поро койышан, пыртак ӱҥышӧ.
Тудо изинек ача деч посна кушкын. Школ деч вара институтыш тунемаш пурен, но пытарен шуктен огыл. Аваже нелын черланен. Самырык ӱдырлан пашаш пураш логале: икмыняр вере кӱварым мушкын. Чонлан келшыше сомыл огыл гынат, оксам кондышо. Адакшым тыге тудо аваж пелен шукырак жапым эртарен кертын.
Эмлан шийвундо шуко кӱлын, садлан ӱдыр тӱрлӧ кидпашам ыштен, ужален. Вара мӧҥгыштыжӧ тортым кӱэшташ тӱҥалын.
Изин илыш саемын.
А вара ик кечын аваже вес тӱняш трук каен колтен. Оля шкет кодын. Ӱдыр чот ойгырен, вет аваже тудлан эн лишыл еҥ лийын. Умбакыже кузе лияшат, мом ышташат ӧрын.
Ты жапыште Олялан школышто пырля тунемме йолташ рвезе Коля возен. Тудо шукертак Калининградыште илен. Пӧръеҥ шке илышыж нерген каласкален, тӱрлӧ шыма шомакым возен. Олян чоныштыжо йӧратымаш тул вучыдымын ылыжын. Тыге нуно ик тылзе вашла интернетыште возгаленыт. А вара Коля ик жаплан йомын. Ты жапыште ӱдыр чот тургыжланен. Пел тылзе гыч туддеч серыш толын. Тудо машина дене аварийыш логалмыж нерген возен. Реанимацийыште кием, эмлалташ окса шуко кӱлеш манын. Ольга, тудлан полшаш манын, кредитым налын да оксам Колялан колтен. Шкежат, увертарыде, Калининградыш вес кечынак миен шуын. Эмлымверыш йӧратыме еҥжым кычал миен, а тудо тушто лийынжат огыл улмаш. Ӧрмалгыше ӱдыр Колян адресшым пален огыл, лач пӧртшын фотожо гына лийын. Таксист ты пӧртым кычал муаш полшен. Ик жап уремыште шогымек, Оля машинаш шичше таза Колям, тудын пелашыжым да кок икшывыжым ужын.
Ӱдыр нуным ӧрдыж гыч ончен шоген, шкенжым аҥыра улмыжлан чот вурсен, шер теммеш шортын. Тунам чонжылан тунар куштылго да ласка лийын! Пуйто ала-мыняр ий погынышо, чоным темдыше шӱлык шулен йомын.
Кок кече Оля у олам ончен коштын, вара уэш мӧҥгыжӧ тарванен. Самолётышто Владимир дене палыме лийын. Тудо Оля деч вич ийлан кугурак улмаш. Оля гаяк ешдыме, шкет пӧръеҥ.
Теве ынде пырля улмыштлан вашке вич ият шуэш. Оля – пиалан ӱдырамаш. Тынар ойго деч вара пиалжым содыки муын.
Валентина.
Йошкар-Ола.