Виталий йолташем – 60 ияш вийвал пӧръеҥ. Тудын дене 10 ий утла пашам пырля ыштена. Шукерте огыл мылам ик оҥай историйым каласкалыш.
Тиде кум ий ончыч У ий вашеш лийын. Витя ача-аважын суртышкыжо канышлан кудалын. Чатката пу пӧрт ял тӱрыштак шинча. Ачаж ден аваже вич ий ончыч коленыт. Витя суртым шот дене куча, жапыштыже тӧрлен шога. Яра жапше годым шочмо суртыш толын кайыде огеш чыте. Адакшым мончаш пурашат чотак йӧрата.
Ялыш толмек, суртым эрыктен лектын, мончаш олтен. Монча деч вара кочкаш манын, пеленже шолтымо муным, пареҥгым да шинчалтыме киярым налын. Кочкышым ӱстембак поген шынден, чайым шолтен. Вара шер теммеш мончаш пурен. Шокшо пар деч каналташ манын, диваныш пурен возын да нералтен колтен.
Ик жап гыч помыжалтын – йырваш пычкемыш. Ӱстел коклаште пуйто ала-кӧ шинчылтеш, муным эрыктыме, киярым пурмо йӱк шокта.
– Мо тыгай? Тулым чӱктенам ыльыс, – шоналта семынже Витя. – Ала мончаште аҥыргенам да кызыт пошырнен кием? Кухньыштыжо могай йӱк шокта?
Кынелаш тӧча, капым тарватен огеш керт. Ты татыште ӱстел коклаште шинчыше верже гыч шывыр-шовыр тарваныш да ала-мом пелештыш. Виталий лӱдмыж дене лач кок шомакым гына умылен керте: «Уныкан лият». Ты татыште йолташем «Ой, Юмо арале!» манын шоналтен. Ик жап гыч кид-йолыш вий пурымым шижын, содор гына кынелын, тулым чӱктен. Ӱстембалне пеле пурлмо кияр ден мунышӱм киеныт.
Лӱдмыж дене Виталий тудо кастенак мӧҥгыжӧ кудалын. Пелашыжлан чыла каласкален, а тудыжо чылтак ӧрмалген. Ик шагат ончыч тудо шешкыштын мӱшкыран улмыж нерген пален налын.
Кандаш тылзе гыч Виталийын уныкаже шочын. Ӧрат веле, коча лийшаш нерген тудым кӧ шижтарен?
Константин.
Шернур район.