Тиде 30 ий ончыч лийын. Тунам 20 ийым теменам ыле. Саша качымарием дене кок ий келшенна. Весела, поро шинчаончалтышан рвезе.
Кеҥеж каныш. Ик кастене омым ужам. Надя йолташ ӱдыремын пӧртӧнчылныжӧ шогем. Кас каваште шӱдыр шотлен пытарыдыме. Ваштарешем – у тылзе. Тудым ончен, кужу ӱппунемым шерын шогем. Пӧрт омсам Надя почеш да ош туфльым шуя. «Чиен, висен ончал» , – манеш. Туфльыжо моткоч мотор. «Мый тудым висыде налам», – манам. Туфльым кидышкем кучем, оҥ пеленем ӧндалам. Чонемлан тыгай ласка лиеш.
Вес кечын омем нерген ковамлан ойлышым. Тудо омем тогедаш пиже.
– У тылзе – у каче, ӱппунем – кужу корно. Уныкам, тый, товатат, вашке марлан лектат, – мане.
– Ковай, мый Сашам йӧратем, тетла вес качым ом вучо, – шыргыжал каласышым.
Кастене Надя йолташ ӱдырем деке шочмо кечышкыже кайышым. Тушко утларакшым мемнан ялысе ӱдыр-рвезе-влак погыненыт ыле. Коклаште ик палыдыме рвезе шинчамлан перныш. Кужу капан, кудыр ӱпан, шоптыр гай шем шинчан. Тиде Виталий улмаш. Тудо Надян изаж дене пырля армийыште служитлен. Шкеже тора кундем гыч лийын. Марий Элым ужаш шонен толын.
Кас пеш веселан эртен. Мыят Виталийын шинчашкыже перненам. Рвезе мыйын нерген иктым-весым йодыштын. А пайрем деч вара мӧҥгӧ марте ужатен. Витя мылам ушан-шотан, тыматле рвезыла чучын. Тудын пелен ала-молан моткоч оҥай да весела лийын.
Тыге ме ик арня вашлийынна. Вара Витя мӧҥгыжӧ каяш тарваныш. Пытартыш кастене мыйым пырля каяш йодо. Ӱдырлан тыге каяш намыс манын ойленам. Вет ме тунам ик арня веле палыме лийынна. Тыге Виталий мӧҥгыжӧ шкет кудалын. Ик тылзе гыч ача-авам деке мыйым йӱкташ толын. Мый марлан лекташ келшенам. Изирак сӱаным ыштенна да пелашем деке Дальний Востокыш кудалынна. Тушто 15 ий утла иленна. Вара шочмо Марий Элышкем илаш пӧртылынна. Теве тыге ковамын ойлымыжо шукталтын.
Валентина.
Йошкар-Ола.