Шукерте огыл тазалыкым пеҥгыдемдыме «Таир» рӱдерыште самырык туныктышо ден наставник-влакын регион-влак кокласе XII форумышт лийын. Ты форумын ик чолга участницыже – Шернур посёлкысо кокымшо номеран школышто ритмике ден хореографийым туныктышо Ольга Васильева.
Уста хореограф
Ӱдыр Иркутск областьысе Усть-Кут олаште шочын. Талукаш улмыж годым ачажын шочмо верышкыже, Шернур район Аптулят ялыш, илаш толыныт. Ольган аваже тысе тӱвыра пӧртыштӧ директорлан пашам ыштен, садлан ӱдыр изинек сценыште мурен да куштен. Кукнур школышто индеш классым тунем пытарымеке, ончыкылык илышыжым ты сомыл денак кылдаш шонен да И.С.Палантай лӱмеш тӱвыра ден сымыктыш колледжыш тунемаш пурен.
– Дипломым налмек, Шернур посёлкысо йоча усталык пӧртыш хореографлан пашаш тольым, – каласкала Ольга Вячеславовна. – А ик ий гыч кокымшо номеран школышто ритмике ден хореографийым туныкташ тӱҥальым. Теве ынде 10 ий йоча-влакым кушташ туныктем. Пашамым уло чон дене йӧратем, икшывем-влакат эн талантан да уста улыт.
Туныктымо мастарлыкым нӧлташ манын, О.Васильева 2010 ийыште Марий кугыжаныш университетыш заочно тунемаш пурен, хореографический коллективын художественный вуйлатышыже специальность дене дипломым налын.
– 2011 ийыште школ пелен йоча-влаклан «Грация» куштышо ансамбльым чумыренам, – ойла хореограф. – Тушко 3 ияш гыч тӱҥалын 17 ияш марте икшыве-влак погыненыт. Кызыт ансамбльын кок составше уло. Икымшыш изирак ийготан йоча-влак коштыт, кокымшыш – кугурак класслаште тунемше-шамыч. Ансамбль дене районышто, республикыште эртыше тӱрлӧ мероприятийыште мастарлыкнам ончыктена. Тыгак Чебоксар, Пермь, Киров, Зеленодольск олалаште эртыше конкурслаште участвоватленна. Российысе ятыр таҥасымаште сеҥыше радамыш логалынна. Тӱрлӧ жанран куштымашым шындена.
Тыште икшыве-влак изинек уста шӱлышан кушкыт, шкеныштым тӱрлӧ могырым шуарат, капкылыштым лывыртат. Сценыште шкем кучен мошташ манын, шуко тыршена. Кугурак йоча-влаклан арняште вич шагат жапым ойырем, изирак-шамычлан – кок шагатым. Паша кечем эр гыч шым шагат кас марте шуйна.
Коллективын диплом ден грамотшо моткоч шуко, тидыже туныктышын икшыве-влак дене устан пашам ыштен моштымыжым пеҥгыдемда. Ольга – чолга, эре ум кычалше, виян туныктышо. Тудын йыр тунемше-влак мӱкш гай пӧрдыт.
Чолга мер пашаеҥ
Ольга Вячеславовна – тӱрлӧ шӧрынан айдеме. Тудо Шернур районысо молодёжный парламентын чолга еҥже. Районысо мер пашаште, мероприятийлаште уло кумылын участвоватла. 2020 ийыште «Российысе ӱдырамаш ушем» молодёжный форумыш миен. Тушко Российысе 33 регион гыч эн уста самырык еҥ-влак погыненыт, шке социальный проектыштым араленыт. О.Васильеван «Помнить всем Отечеством» проектше эн виян паша-влак радамыш логалын, посна номинацийыште палемдалтын. Ты проект шоҥгыеҥ-влаклан полшаш ышталтын. Тудым «Российысе ӱдырамаш ушем» полшымо дене илышыш шыҥдарыме. Шукерте огыл чолга ӱдыр ты ушемын молодёжный парламентышкыже пурен.
Кодшо ийын Шернур посёлкышто Марий Эл Республикын 100 ияш лӱмгечыжлан пӧлеклалтше «Край родной – Марий Эл» концерт годым О.В.Васильевалан РФ Президентын «За бескорыстный вклад в организацию Общероссийской акции взаимопомощи «#МыВместе» медальжым кучыктеныт. Ольга волонтёр семынат шуко тырша. Пандемий жапыште тудо шоҥгыеҥ-влак деке лумым эрыкташ коштын, нужнан илыше еш-влаклан кочкыш наборым нумалын.
Ӱдыр тыгак Шернур районысо самырык туныктышо-влак каҥашын председательжын сомылжым шукта. 2015 ийыште тудо районысо туныктышо ден воспитатель-влаклан «Грация 30+» ансамбльым чумырен. Нунын дене пырля ятыр мероприятийыште участвоватлат.
– Июнь мучаште «Таирыш» самырык туныктышо ден наставник-влакын форумышкышт мийышна, – каласыш тудо. – Шуко ум пален налынна, оҥай да уста коллегына-влак дене вашлийна, мутланышна. Вет чын туныктышо шкежат эре тунемшаш, ончыко кайышаш, тунам веле тудо икшыве-влакын ӱшаныштым сула.
Яра жапыште Ольга Вячеславовна спорт дене пеҥгыде кылым куча, волейбол, баскетбол дене талын модеш. Пелашыж дене пырля Регина ден Злата ӱдыр-влакым ончен куштат. Злата аваж гаяк артист шӱлышан, мураш, кушташ мастар.
Икшыве-влак дене чон йӱлен пашам ыштыше чолга самырык еҥым ончен куанет да кугешнет. Тек тудын вий-куатше кечын шукемеш, а усталык шӱлышыжӧ ден поро кумылжо эре пеленже лийыт.
Фотом О.Васильеван
альбомжо гыч налме.