Лу ий ончыч ик шыже кечын авам деке шочмо ялыш машина дене кудальым. Кугорно дене 70 меҥгым кайыман, а пасу корно дене 20 меҥгыш веле погына. Йӱр лийын огыл, корно кукшо ыле, садлан вик корно дене каяш тарванышым. Кас велеш шочмо суртыш толын пурышым. Авам куанен вашлие.
– Пеш лачеш толынат. Таче – пошкудо ял Метрий кочайын ныллыже. Пырля миен савырнена.
Авамын шомакше дене келшышым. Метрий кочай илымыж годым поро, мыскара кумылан ыле.
Еҥ коклаште жап пеш писын эртыш. Пошкудо-влак дене шер теммеш мутланышым. Йӱдым озавате тора гыч толшо-влакым машинам дене наҥгаен кодаш йодо. Кок-кум шагат жапыште кок тӱшкам наҥгаен кодышым. Мӧҥгеш пӧртылмем годым машинам чыгынен шогале. Бензинем пытен улмаш. Мом ышташ? Эн лишыл заправке марте 10 меҥгым ошкылман, вара мӧҥгеш – тынарак. Йӱдым пасу корно дене машинажат огеш кудалышт. Канистрым нальым да кугорно могырыш ошкыльым.
Семынем Метрий кочайын родыжо-влакым вурсем:
– Малаш кодын огыт керт ыле мо? Мом йӱдым каяш тарваненыт?
Тораште огыл машина тул койылалтыш. Кидем пеш чот рӱзем. Ышчарне. Пеш вашке эртен кудале.
– Метрий кочай, шокшо тӧшакыште ракатланен малыме олмеш тыйын верч шыже йӱдыштӧ кылмен коштам, – умбакыже вурседылам шке семынем.
Трук эртен кудалше машина угыч пӧртыльӧ. Кузе, мо лиймым пален налмек, палыдыме пӧръеҥ пел канистр бензиным йоктарен пуыш. Палыме лийна. Лӱмем Дмитрий манын каласыш.
Поро чонан еҥлан тауштен, машинам деке тӱрлым шонкален ошкыльым. Можыч, тоштыеҥ Метрий кочай мылам тыге полшен?
Вадим.
Кужэҥер район.