Автор — Роксана Аймурзина.
Илена пуйто кок тӱняште: иктыштыже нимат вашталтын огыл, ончычсо семынак пашаш коштына, йолташ-влак дене ужын кутырена, волгыдо кечылан куанена. Весыштыже – кажне кечын лӱйкалымаш, кредалмаш, ойго. Кӧн лишыл еҥже тушто, тудо гына умыла, могай неле кокытеланен илаш. Чон – родо, икшыве, пелаш пелен. Мемнан ешышкат шучко увер тольо. 26 августышто Украиныште СВО-што тукым изам Дмитрий Аймурзинын ӱмыржӧ кӱрылтын.
Дима изам Югра кундемысе Нижневартовск олаште шочын. Ешыште кокымшо йоча лийын. Ача-аваже (ачаже, Петя паваем — ачамын шочмо изаже) Пошкырт кундемын шочшыжо улыт. Самырыкышт годымак Йӱдвелыш илаш кусненыт. Тушто Марина ӱдырышт ден Дима эргышт шочын-кушкыныт.
Изам Нижневартовскысо 6-шо №-ан школым тунем лектын. Туныктышо-влакын шарнымашышт почеш, урокышто пеш тыматле, чолга лийын, кумылын тунемын. Дима патриот шӱлышан кушкын, элна дене эре кугешнен.
2003 ийыште кыдалаш специальный образованийым налын. 2005-2007 ийлаште армий радамыште служитлен. Тушто водитель лийын. 2008 ийыште Ингушетийыште служитлен, туштак «Военный действийын ветеранже» лӱмым сулен налын. Толмекше ешаҥын, Родион эргыже шочын. Варажым «Электротехмонтаж» предприятийыште пашам ыштен.
Изам чӱчкыдынак соцсетьыште «Шӱжарем, салам» возен, родо-влак нерген йодыштын, пайрем дене саламлен. Очыни, тидланак моло тукым изам деч лишылрак лийын.
Икана урем дене каем, «ВКонтакте» соцкылыш серыш тольо. Ужам, изам воза: «Салам, шӱжар! Ынде шуко ий ужын огынал, фотода-влакым ончем да куанем, кузе чылан кушкында. Ача-аватлан саламым каласе».
Кодшо кеҥеж тӱҥалтыште отпусклан Пошкырт кундемыш ача-аважын шочмо верышкышт родо-влакым ужаш толын кайыш. Мыйын ачам-авам денат Мишкан район Пӱрӧмучаш ялыш икмыняр кечылан кодын. Вара ачам коваж дек пошкудо ялыш намиен коден. Тушто Дима изам кочажын шӱгарышкыжат миен. Кызыт тыге чучеш, пуйто ала-мом шижын, чылашт денат пытартыш гана чеверласаш толын. Тунамак авамлан ойлен: «Могай чон дене мӧҥгыштӧ шинчаш тӱҥалам, кунам элем, шочшем осал деч аралаш кӱлеш. Мый тыге ом керт. Садыгак каем…»
Шке кумылын Шочмо элым аралаш каяш шонымашыже тунамак лийын. Военкоматыш повесткым шкеак йодын миен. Пел ий гыч вучымо повесткым кидышкыже налын. 2022 ий 12 декабрьыште «ВКонтакте» соцсетьыш армий годсо беретке ден повестке фотом шынден да возен: «Мыйынат жап шуын…» Тиде возымыжым ужынам да йӧршын кумылем волен. Но тыгодымак кугешнымаш кумыл лийын: изам чын пӧръеҥ, патриот семын ыштен.
Учений жапыште соцсетьыш чӱчкыдын возкален, фотом колтылын. Ужар военный форман, самырык да таза капкылан изамым ончен, чонем шортын, илышыж верч ойгыренам. Вес могырым шоненам: могай тале мыйын изам, тудын дене кугешнем. Пытартыш гана ученийыште лиймыж годым йӱкан серышым возен. Шӱжарем, ит ойгыро, чыла сай лиеш манын лыпландарен.
СВО-ш логалмек, шуэнрак йыҥгырташ тӱҥалын. Южгунам тылзе огеш йыҥгырте ыле. Тыгай годым Соня кокам да Петя паваем деч тудын нерген йодыштынна. Эн лишыл еҥже-влаклан кертме семын йыҥгыртен: «Илыше улам, чыла сай». Дима тушто пулемётчик лийын.
Октябрьыште изамлан 38 ий веле темеш ыле. Тиде тылзынак отпускыш толаш ыле, ме чылан тудым чот вученна. Но шучко увер чыла сай шонымашнам кӱрлын.
25-26 августышто Донецк областьысе Клещеевка посёлкышто кредалмаш годым кок сусыр салтакым утарен луктын, а вара шкежат нелын сусырген.
Изам уке… Тетла ок тол. Тетла ок возо: «Шӱжарем, салам…» Тидлан эше ӱшанашат неле. Шарнем, тудо моткоч весела, шыргыжаш йӧратыше лийын. Гитарым шоктен, мурым мурен. Туштат сай кумылжым аралаш тыршен, мыскарам ыштен.
Шукерте огыл Дима изам Саша изамлан ик минуташ видеом колтен улмаш. Тушто каласкален: «Воктенем миномётчик йолташем шинча. Ме коктын тушманын постшым чодыра гоч кок меҥге йолын эртенна. Тиде пост чодырам оролен. А ме кертна тушто каен, кушто нигӧ каен ок керт. Теве мо тыгай спецгруппо. Ме верысе таксист деке посылкым налаш корныш лектынна. Чыным каласаш гын, мӧҥгеш тиде корно денак, тушман пост воктеч, угыч кайыман. Но мый чыла сай лиеш манын шонем…»
Тиде видеом ончышымат, чонемлан шучко лие. Тиде вет кино огыл, а чын! Трук мӧҥгеш кайымышт годым тушманым вашлийыт, тунам мо лиеш?
Видеом уэш-пачаш ончем, а изам тетла уке… 11 сентябрьыште тоеныт. Россий Президентын Указше почеш тудлан «За мужество, отвагу и самоотверженность» орденым пуэныт.
Кийыме мландет пушкыдо лийже, изаем. Узьмакыште лий. Ме тый денет кугешнена. Дима изам — Герой!
Пошкырт кундем.