Кокам эмлымверыште пашам ышта. Тушто ужмо-колмо нерген шуко оҥайым да ӧрыктарышым каласкала.
Икана нунын деке шоҥго ковайым конденыт. Тудо кум кече шинчам почде киен. Нылымше кечын трук кынел шинчын, шинчам почдеак, шке семынже кумалаш тӱҥалын. Вара ондакысе семынак пурен возын да тетла кынелын огыл.
Вес историйым тушто эмлалтше ӱдырамаш ойлен. Тудо шучко пожарыште пелашыж ден шӱжаржым йомдарен. Шӱгарлаш мийыме годым ӱдырамаш шӱжаржын шӱгар ӱмбакыже, кайыкым пукшаш манын, тар шӱрашым шавалтен улмаш. Тудо кастенак тудлан омо кончен. Пуйто мланде йымаке вола, тушто пеш шуко еҥ уло. Южыжо тӧшак ӱмбалне шинчат, южыжо – пушкыдо моко ӱмбалне. Трук тораште огыл шӱжаржым ужеш. Ӱдыр моткоч ярнышын коеш, акаж ӱмбак огешат ончал, вуйжым ӧрдыжкӧ савыра, кидшым шылта. Вучыдымын кугу чыве чоҥештен толеш да шӱжаржын кидшым чӱҥгаш пижеш. Тудо моткоч орлана да сӧрвален йодеш:
– Тетла шӱрашым ида шаве, чыла кидем чӱҥген пытареныт.
Тылеч вара ӱдырамаш шӱгар ӱмбалне нимогай кочкышым коден огыл.
Кумшо томаша шукерте огыл лийын. Светлана кокамын дежурствыж годым кочайым конденыт. Эр велеш шоҥгыеҥ Светланам шкеж деке ӱжын да йодын:
– Молан йошкар пийым шыч пурто? Омса шеҥгелне вучен шога вет.
Ӱдырамаш трукышто ӧрын:
– Кочай, могай пий? Тышке пийым огыт пурто.
– Уна, теве почешет тыҥге-туҥге икмыняр гана коштыс. Изи тыгай, таксе урлык маналтеш ала-мо.
Светлана лӱдмыж дене мом пелешташат ӧрын. Икмыняр кече ончыч тудын Боня лӱман шоҥго таксе пийже колен. Тыгай томаша-влакым колыштын, тӱрлыланат ӱшанаш лиеш.
Галина.
Советский посёлко.