Тӱрлӧ тӱсан куан

Кызытсе ик сӱанат, йоча пайремат тӱрлӧ тӱсан шар деч посна огыт
эрте. Тудо кеч-могай мероприятийлан пайрем кумылым пурта. Шар дене тӱрлӧ композицийым ыштен моштышо еҥ-влакым аэродизайнер
маныт. Теве Медведево район Юбилейный посёлкышто илыше
Ульяна Яндулова ты сомыллан шукерте огыл кумылаҥын.

Аэродизайныште икмыняр тӱрлӧ йӧн уло. Нунын кокла гыч иктыже – твистинг. Тудо, тӱрлӧ кугытан шарым пӱтырен, сылне композицийым ыштымым ончыкта. Ты искусство ХХ курым мучаште вияҥаш тӱҥалын. Тыгак аэродизайнер-влак пластике йӧным кумдан кучылтыт. Тӱрлӧ кугытан, форман шар-влакым икте-весын кӧргышкышт вераҥдат. Тыге мультипликационный персонаж, янлык, кайык-влак «шочыт».

Ульяна Юбилейный посёлкысо школ деч вара строительный техникумышто прораблан шинчымашым поген. Профессий дене пашам ыштен огыл. Ӱдырамаш ятыр ий кевытыште тырша. У.Яндулован кажне пашаже чонышто куан кумылым ылыжта, йоча жапыш пӧртылта.

Тыгай ойыртемалтше пашалан кузе да кунам кумылаҥында?

Тӱрлӧ тӱсан шарым йоча пагыт годсек йӧратем. Шочмо кечем годым йырваш сӧрал, мотор, ойыртемалтше лийже манын эре шоненам. Шар дене ыштыме композицийым икымше гана йочасадыште кугурак эргымын выпускнойжо годым ужынам. Тудо вигак шинчамлан пернен, чоныш логалын. Эх, тыгай моторлыкым шочыкташ тунемшаш ыле манын шоналтенам. Кузе пӱтыркалымым шымленам, кучен, пӧрдыктыл онченам, иктаж гана тыгайым ыштен ончаш шканем товатленам.

Кокымшо эргымын выпускнойжылан ала-мом тыгайым ойыртемалтшым ямдылымем шуын. Тыге шар дене икымше композицийым ышташ шонымаш шочын. Тӱҥалтышлан эн шулдо ик пачке шарым налынам. Интернет полшымо дене кечым, шонанпылым, пеледышым ышташ тунемынам. Ондак йӧршын нимоат лектын огыл: икте почеш вес шар пудештын, кушкедлен. Икмыняр кече орланымек, композицийым ямдылен шуктенам. Тылеч вара йочасадын пашаеҥже-влак кажне ийын выпускной касым сӧрастараш йодыныт.

Аэродизайнлан иктаж-кушто лӱмынак тунемында мо? Ты сомылым ыштыме годым могай нелылык уло?

Утларакшым паша деч вара кастене Интернетысе видео-влак почеш тунемынам. Ондак ик пеледышым ышташ иктаж 10 минут жап кӱлын, кызыт 2 минутат сита. 20 минутышто шар дене чапле пеледыш аршашым ямдылен шуктем. Шар фигурым ышташ 2 шагат дене шинчылташ перна. Эн неле йӧн – пластике. Тидлан шар кӧргышкӧ шарым вераҥдыман, фигур-влак вашла келшен толышт манын, чот тыршыман.

Эн оҥай да ушеш кодшо заказда могай лийын? Могай мероприятийлан композиций-влакым ямдыленда?

Икымше паша эре ушеш кодеш, садлан йочасадлан ямдылыме композицийым эн шергылан шотлем. Эн оҥай фигур коклаште – Лол курчак. Тудым заказ почеш 3 ияш ӱдырын шочмо кечыжлан ямдыленам. Тылеч вара икмыняр выпускнойым, шочмо кечым, юбилейым, сӱаным шар дене сылнештаренам. Кызыт утларакшым гелевый шар дене композицийым ышташ йодыт. Ыштыме пашам вес еҥлан куаным конда гын, тиде – моткоч кугу пиал.

Тылеч посна тӱрлӧ кочкыш дене аршашым ыштеда? Кудо сомылжо чонлан лишылрак?

Конфет, колбаса, сыр, коштымо кол, тӱрлӧ пӱкш дене сӧрал композицийым йолташ, палыме-влакын йодмышт почеш келыштарем. Кочкыш сатум налме, ойырымо годым пеш чот тӱткӧ лийман. Тиде моткоч шуко жапым да вийым налеш. Тыгак кочкыш вашке локтылалтеш, садлан аршашым кӱчык жапыште ямдылен да пӧлеклен шуктыман. Тидлан кӧра шар дене композицийым ышташ утларак келша.

Тыгай кидмастар-влакым ончен, Америкысе лётчице Амелия Эрхартын ушан ойжо ушыш пура: «Эн неле тӱҥалаш, молыжо тыршен пашам ыштыме деч шога». Вет чот тыршет гын веле кеч-могай сомыл ворана.

Ульянан альбомжо гыч налме фото-влак.