Кӱлыт: 200 гр ушкал шыл, 200 гр сӧсна шыл, 150 гр ветчина, 80 гр шож шӱраш, 100 гр оливке, кок пареҥге, шинчалан кок кияр, кок кугу совла томатный пасте, кок лавр лышташ, 4 душистый пырче пурыс, йоҥыштымо шем пурыс ден шинчал – там почеш.
Солянкым ик шагатат 40 минут шолтыман. Шож шӱрашым, йӱштӧ вӱдым пыштен, 2-3 шагат ончылгоч лӧчыктарыман. Варажым, вӱдшым вашталтен, шӱрашым 30 минут шолтыман, чотак кӱйшӧ лийшаш огыл.
Ушкал шылым каструльыш мушкын пыштена, вӱдым, лавр лышташ ден пурысым ешарена. Шоҥым кораҥден, сайын кӱмыж марте шолтена. Ветчина ден сӧсна шылым, олым семын пӱчкедена. Киярымат тыгай сынанымак тыгыдемдена да томатный пасте дене кум минут жаритлена. Шылым лем гыч луктын, изирак падырашлан пӱчкедена да мӧҥгеш пыштена. Лемыш кужу кутыш дене пӱчкедыме пареҥгым, сӧсна шылым, ветчинам да тыгак шож шӱрашым ешарена, чылажымат пырляже 15 минут шолтена. Тылеч вара жаритлыме киярым пыштена да, жапын-жапын пудыратен, эше 15 минут газплиташте кучена. Тулым йӧртен, каструльым петырен, 10 минут шогыктыман да талиҥгалашке оптыман, кажнышкыже ик совла оливкым да лимон пӱчкышым пыштыман.
Перкан лийже!