21 июньышто Шернур район Кукнур шӱгарлаш Кугу Ачамланде сарыште увер деч посна йомшо Иван Иванович Таныгинын лулегыжым конден тоеныт. Тидын лӱмеш селаште митинг лийын. Тушко геройын родо-тукымжо толын.
Сержант Иван Таныгин 1923 ийыште Шернур район Кугу Пӱнчер ялыште шочын. Сарыш 1942 ий февральыште каен, тудо ийынак ноябрьыште увер деч посна йомын.
Салтакын лулегыжым «Последний бой» военно-патриотический клубын участникше-влак 23 апрельыште Ржев ола воктене муыныт.