Пеҥгыде капкылан, лопка туп-вачан тиде чолга рвезым икымше гана 2012 ийыште «Марий КВН» годым ужынам. Тунам тудо МарГУ-со Финн-угроведений институтын студентше лийын. Кызыт Спартак Шестаков У Торъял
район Кузнеч школышто марий йылмым да литературым туныкта.
Спартак шкежат ты школышто 9 классым тунемын. Рвезе футбол, баскетбол, волейбол дене талын модын, телым ече дене коштын. Умбакыже кок ий Советский район Ӱшнур кыдалаш школышто шинчымашым поген. 11-ше класс деч вара Спартак ПГТУ ден Йошкар-Оласе строительный техникумыш тунемаш пураш шонен. Но пӱрымаш тудым Финн-угроведений институтыш конден.
«Тунемме верлашке документ-влакым пуымо годым корнышто Людмила Ивановна Барцевам вашлийым, – каласкала Спартак Иванович. – Тудо мыланна Ӱшнур школышто марий йылмым туныктен. Людмила Ивановна мыйым марий филологлан тунемаш толаш ӱжӧ. Могай документым кондымо, могай экзаменым кучаш кӱлмӧ нерген умылтарыш. Мыланем тыгай еҥын каҥашыже пеш шерге лийын, садлан лач ты факультетыш тунемаш пураш тыршенам. Кӱшыл шинчымашым налам гын, паша верым муаш куштылгырак лиеш манын шоненам».
Студент пагыт пеш веселан да пайдалын эртен. Тунамак Спартак «Кугарня» газетын поро йолташыже лийын. «Марий КВН»-ыште газетнан «10-ка» командыштыже модын. Мыскара кумылан, сценыште шкем ончыктен моштышо рвезе ончышо-влакын кумылыштым савырен. Вес ийын С.Шестаков И.Попов, Д.Очиев да Д.Новиков дене пырля «Воштылаш, товатат, сулык огыл» конкурсыш ушнен. Тунам рвезе-влак кумшо верыш лектыныт.
Дипломым налмеке, самырык специалист паша вер нерген шонкалаш тӱҥалын. А чон шочмо Кузнеч ялыш ача-ава суртыш ӱжын. Тыге 2015 ий гыч рвезе «Акашево» чыве фабрикыште пашам ышташ тӱҥалын. Тушто птицевод, мастер, варажым оператор лийын. Тыге ныл ий шижде эртен.
«2019 ийыште Кузнеч школышто англичан йылмым туныктышо Василий Иванович Веденькиным вашлийым, – ойлыш Спартак Иванович. – Марий йылмым да литературым туныктышым огына му гын, школнам петырат манын каласыш. Тыгайым колмек, пашаш толам манын, пеҥгыдын ойлышым. Теве ынде кок ий марий йылме ден литературым туныктем. Тыгак 5-ше классын вуйлатышыже улам, 6-шо классым 9-ше класс марте руш йылме ден литературым туныкташ тӱҥалам. Кузнеч школышкына Кӱшыл Кожлаял, Ӱлыл Кожлаял, Кузнеч, Ошканэҥер, Кандашплак, Крешын Руй гыч йоча-влак коштыт. Чылаже 42 тунемше ден 10 туныктышо улыт. Тора ялла гыч йоча-влакым школ автобус шупшыкта. Школышто марий йылме ден литературым туныктымо шотышто ситуаций республикысе школла деч огеш ойыртемалт: йоча-влак рушаҥын толыт. Шочмо йылмым, йӱлам, тӱвырам йӧраташ изинек туныктыман. Тыште школ гына полшен огеш керт, ешыште, йочасадлаште марла мутланаш кӱлеш».
Школыш толмек, Спартак ондакысе пашажым кудалтен огыл, чолга рвезе кок вереат ыштен шукта.
Яра жапыште самырык туныктышо спорт дене кылым куча. Велосипед дене коштеш, сурт кокласе сомылым вораҥда.
«Ялыш толмемлан ом ӧкынӧ. Шочмо школышто пашам ышташ – кугу куан да суап. Пашам ышташ шонышо еҥлан ялыштат паша верым муаш лиеш. Мемнан дене школ, клуб, чыве фабрике улыт, «Первый май» колхоз виян», – пелештыш самырык специалист.
Рвезын альбомжо
гыч налме
фото.