Кугезе ковамын шочмо ялже кугу кожла коклаште верланен улмаш. Чодыраште шуко янлык ден кайыквусо иленыт. Тышке пошкудо ялла гыч сонарыш чӱчкыдын коштыныт.
Ик теле кастене ялышкышт палыдыме кум сонарзе толын лектын. Рвезе-влак касеш кодыныт, малаш пурташ йодыныт. Ял тӱрыштӧ Васлий кугызан кугу пӧртшӧ улмаш. Пеҥгыде, кумда суртым ужын, качымарий-влак тышанак вераҥаш шонен пыштеныт. Васлий кугыза кугу сурт воктене верланыше изи пӧрт гыч лектын да пелештен:
– Малаш верым пуаш тореш омыл. Пӧртым кум ий ончыч чоҥенам, но ик йӱдымат тушан мален кертын омыл.
– Кочай, ме тыгай-тугайлан огына ӱшане, – воштылыныт корныеҥ-влак.
– Мый тендам шижтарышым, ӱшанеда але уке – шке паледа, – пелештен шоҥгыеҥ да изи пӧртышкыжӧ малаш ошкылын.
Рвезе-влак у суртышто вера-ҥыныт. Кас кочкышым ыштеныт да сорта тулым йӧрыктен малаш возыныт. Тул йӧрымек, ала-кушеч муро йоҥгаш тӱҥалын, йырваш йӱк-йӱан шоктен. Пуйто суртышто шинчалан койдымо кугу пайрем тарванен. Сортам угыч ылыжтеныт – йӱк тунамак йомын. Ик жап вучалтымек, сортам угыч йӧртеныт, пӧртыштӧ адак гӱжлымӧ йӱк тарванен. Тыге икмыняр гана лийын. Эр велеш ярнен пытыше сонарзе-влак Васлий кочай деч мо тыгай лиймым умылтараш йодыныт.
– Сурт чапле, у, тольык иктат тушто илен огеш керт. Яра шинча, пужен кудалташат чаманем. Ойлат, пуйто тыште ала-кунам овда корно каен. Можыч, верже каргыме, можыч, чынак овда корнеш шынденам…
Майя.
Шернур район.