Кодшо кечылаште ик соцкылысе лаштыкышкем вучыдымо серыш тольо. Тудо тӱрлӧ нерген шонкалаш таратыш, газетыш возаш кумылаҥдыш.
«Салам, икымше йӧратымашем!..» – тыге возалтын серыш тӱҥалтыште. Трукышто ӧрынат кайышым, лаштыкыште ончыктымо айдемын лӱмжат, сынжат палыдыме. Умбакыже лудым: «Пытартыш гана тыйым ужмемлан 15 ий эртыш. Кузе вашке илыш куржеш! А тый вашталтынат. Воктечем туге писын эртен кайышыч, иканаште пелешташат ӧрым. Тыят мыйым шыч пале. А мый ошкылметым кужу жап ончен шогышым. Ала-молан кече мучко тыйын нерген веле шонкалышым. Вара ончычсо йолташна-влак деч кушто илыметым пален нальым. Пӧрт воктенет машинаште эскерен шинчышым. Тыйын ошкыл колтыметым тора гычак палышым. Кумылет уке ыле ала мо, нойышо, шӱлыкан койыч. Ваштарешет куржын лекмем шуо, но ала-молан шкемым кучышым, можыч, орадыла кояш лӱдым. Вес кечынат ушем гыч шыч лек. Тыйым куандарымем шуо: курьер дене мӧҥгет йӧратыме ош хризантем аршашетым колтышым… Эх, ончычсо жапыш угыч пӧртылаш лиеш гын, чылажат вес семын ыштем ыле. Палем, лӱдшӧ, вожылшырак лийынам… А тыйым ужмемлан чынжымак чот куанышым. Иктым веле йоднем: нигунам ит ойгыро, пиалан лий, шукырак шыргыж!..»
Нелеш ида нал, но серышым тичмашнек ом ончыкто. Амалже – тудо мылам йоҥылыш толын. Но тудо мыйым теве мо нерген шонкалаш таратыш: икымше йӧратымаш чонышто эре ила. Жап эртыме семын ончычсо чон вургыжмаш мондалтеш гынат, тӱрыснек огеш йом. Эртен кайыше пагыт нерген ойганаш огыл манын, чолга лийза, йӧратем манаш ида аптыране. Илышлан куанен, кажне кечын шыргыжса да пиалан лийза!
Раисия.
Йошкар-Ола.