Пызле пеледеш

Мария Михайловна дене иктаж 10 ий наре палыме улына. Лач тынар ий ончыч тудо мыйын пошкудем лие. Оласе илыш деч каналташ манын, ик ялыште изирак оралтым нальым. Икана пакчаште пургед шогылтмем годым изирак капан, весела шинчаончалтышан ковай лишеме. Палыме лийна. Ынде теве ятыр ий ваш келшен илена. Пошкудем – илышым палыше, кугу опытан айдеме. Шукерте огыл тудо мыланем ик оҥай историйым каласкалыш.

Мария Михайловнан Галина йолташ ӱдыржӧ лийын. Самырык пагытышт пырля эртен, а вара Галина Ростов кундемыш марлан лектын. Нуно икте-весылан серышым шуко жап возкаленыт. Пытартыш ийлаште гына телефон дене мутланеныт.

Кодшо ийын июльышто Мария Михайловналан омо кончен. Пуйто Галина поездыш моткоч вашка. Кугу котомкам кучен, йолташ ӱдыржылан кидше дене лупша да ойла:

Пеш тораш каем, Маню. Миен шумекем, кузе вераҥмем нерген каласем. Удан миен шуам гын, иктаж родем толын налаш йодам, сайын гын,   вашке пызле пеледеш.

Помыжалтмек, Мария Ивановна тӱрлым шонкален киен. Мом тиде омо ончыкта? Пызлыже шукертак пеледыныс. Июль тылзе.

Икмыняр кече гыч чыла рашемын. Мария Михайловна деке Галинан ӱдыржӧ йыҥгыртен, аважын уке лиймыж нерген ойлен. Пошкудем йолташ ӱдыржым пытартыш корныш ужаташ миен да чот ӧрын. Галинан шӱгарже воктене самырык пызле июльышто пеледалт шогалын.

Тугеже, Галю, сайын миен шуынат да ласкан вераҥынат, – пелештен тудо.

Е.Иванова.

Медведево посёлко.