Мончаш пелйӱд деч вара пураш сай огыл манын, ковам деч шуко гана колынам гынат, самырык вуем дене шотыш налын омыл.
Икана кеҥежым дискотеке деч вара мончаште писын шӱалталташ шонышым. Вургемем монча ончылно кодышым да мончаш пурышым. Жап лач пелйӱд лишан ыле.
Ласкан мушкылтмек, монча гыч лекташ тӱҥальым – омса огеш почылт. Уло вием дене тудым шӱкем –
пыртланат огеш тарване, йол дене чумем – адак уке. Трукышто тулат йӧрыш. Лӱдмем дене эсогыл кычкырал колтышым. Иктаж 10 секунд гыч тул уэш чӱкталте, да омса моткоч куштылгын почылто. Вургемем руалтышым да лектын куржым. Тунамак пылышемлан монча гыч воштылмо йӱк солнен. Илышыштем тынар чот ик ганат лӱдын омыл ыле. Тылеч вара йӱдым мончаш коштмым чарненам. Иктаж-мом монден кодем гынат, эр марте мончаш ом кай.
Роза.
Кужэҥер район.