Пӱрымаш улмаш

Поро жапда лийже, «Ӱшанем… Вучем…» лаштыкым лудшо йолташ-влак. Тыланда шукертак лийше илыш историйым каласкалынем.

Студент жапыште Эля лӱман ӱдыр дене тӱшкагудышто пырля илышна. Пеш шыма, лыжга, поро кумылан ӱдыр. Тӱжвал сынже денат сылне, уш-акылжат пӱсӧ, кидпашаланат пеш мастар ыле. Элюк мыйын гаяк ялысе, тыглай пашаче еш гыч лийын. Яра жапыште эре книгам лудын. Вич ий жапыште библиотекыштына улшо чыла книгам лудын пытаренат манын воштылам ыле.

Йолташ ӱдырем дене ныл ий пырля илышна. Ты жапыште тудо ик рвезе денат келшен огыл. Ала-мыняр гана тудым пырля уремыш лекташ ӱжынам, но тӱрлӧ амалым кычалын, эре шылын кодын. Визымше курсышто тунемме годым Элям пошкудо ялысе рвезе дене палымым ышташ шонен пыштышым. Тудо тунамсе келшыме таҥемын тора родыжо ыле.

Виталий шофёрлан пашам ыштен. Пашалан моткоч кожмак рвезе, но пеш вожылшо. Иктаж кок арня наре Элялан тудын нерген эре ойлышым. Тыге ик теле кастене нуным палымым ышташ темлышым. Мый Элям паркыш намием, а Слава Виталийым кондышаш ыле. Но ты кастене нунылан вашлияш пӱрен огыл улмаш. Эрдене Элялан ачажын колымыж нерген увертарышт. Тудо кок арнялан мӧҥгыжӧ кайыш.

Ик жаплан Виталий нерген мондаш логале. А вара – диплом, студент илыш дене чеверласымаш. Чылажат моткоч писын да шижде эртен кайыш. Элям Виталий дене палымым ыштен шым шукто: рвезе тора Йӱдвел кундемыш пашам ышташ кайыш. Эля шочмо кундемышкыже пӧртыльӧ, мый Йошкар-Олаште илаш кодым.

Тылеч вара лу ий эртыш. Ты жапыште келшыме таҥемлан марлан лектым, изи ӱдырна шочо. Ик кечын почтальон мылам сӱаныш ӱжмашым кучыктыш. Тыге Элюкем марлан лектеш манын пален нальым. Моткоч куан увер! Сӱаныш тыманмеш миен шуым. Качымарий ден оръеҥым ужмек, ик жап кӱэмалтше гай лийым. Эля пелен Виталий шога! Саде шофёретак, лу ий ончыч палымым ышташ шонымо каче.

Кастене пиалан мужыр деч кузе палыме лиймышт нерген йодым. Виталий Йӱдвел кундемыште вич ий наре илен. Шочмо велыш пӧртылмек, ик предприятийыш пашаш пурен. Ик кечын тудым районыш командировкыш колтеныт. Тушто тудо Элям вашлийын. Коклаштышт йӧратымаш тул ылыжын.

Пӱрымаш деч от шыл, маныт. Теве Элям Виталийлан вашлияш пӱренак улмаш. Лу ий эртымек, нуно пырля лийыныт. Кызыт ынде коча ден коваят улыт. Туге гынат самырык годсо гаяк вараксимла вычыматен илат.

Вера.

Йошкар-Ола.