Ик кеҥеж кечын Витя йолташем дене пырля ялыш каяш лекна. Корно лишыл огыл, кок шагат наре кудалман. Кугорно дене кудалаш каньыле, а пытартыш 30 меҥгым пасу корно дене кайыман. Мотор кеҥеж кечын тудым шижынат от шукто, а теве ночко игечыште орланаш сита.
Лач пасу корныш миен шумына годым кӱдырчан кугу йӱр оптале. Корно тыманмеш лапашыш савырныш. Ик вере пижына, вес вере. Иктаж кум гана машинам шӱкен лукна. Пычкемышалташат тӱҥале. Трук ончылнырак корно ӧрдыжтӧ ала-мо ошо палдырныш. Иктаж 3-4 метрлан лишеммек, ӱдырым ужна. Ош платьым чиен, кидым пеш лупша, чарнаш йодеш.
Ӱдырым шындаш манын, Витя тора гычак чарналтенрак кудале.
– Мемнан гаяк ораде, йӱр вошт ошкылеш, – пелештыш.
Мый тамакым пижыктышым. Тудо татыштак ӱдыр йомо. Витя ӱмбак ӧрын ончальым, чонлан ньыге-нюго чучо. Лӱдмына дене чарнен шогална. Трук волгенче волгалте, кӱдырчӧ кӱдыртыш, корно воктене шогышо кож мемнан машина ӱмбак изиш гына ыш йӧралт. Илышыштем тынар чот ик ганат лӱдын омыл, очыни. Машина гыч пыкше лекна. Пиалешна, тораште огыл трактор койылалтыш. Пел шагат гыч мӧҥгӧ миен шуна.
Корнышто ужмына нерген ковамлан ойлышым. Тудо тыге мане:
– Ожно ты пасушто самырык ӱдырым волгенче перен манын колынам ыле. Можыч, тендам аралаш манын, тудо корнышкыда лектын…
Саню.
Морко район.