Шочмо кече деч ончыч айдеме южгунам вучыдымын черланен але азапыш логалын кертеш, маныт. Икмыняр ий ончыч мый денемат тыгак лие.
Тунам мылам 22 ий ыле. Шочмо кече деч иктаж кок арня ончыч омым ужам. Пуйто йолташ ӱдырем, мый да палыдыме шофёр грузовой машина дене кудалына. Ӱмбалнем – ош мотор тувыр. Трук шофёр машинам чара да йолташ ӱдыремлан йошкар роза аршашым налын кондаш шӱда. Тунамак мыйын ӱмбакем ончалеш да пелешта:
– Чечас качет дене палыме лияш каена. Таче сӱанда.
Трукышто чонемлан моткоч йӧсӧ лие. Ала-могай палыдыме каче деке кайымем огеш шу, манам. Тунамак йолташ ӱдырем роза аршашым пулвуйышкем пышта. Йошкар роза ош платемым чиялта. Ты татыште лӱдмем дене помыжалтым…
Иктаж кум кече гыч вучыдымын эмлымверыш логальым. Йӱдым неле операцийым ыштышт.
Эрдене омышто ужмо йолташ ӱдырем йыҥгыртыш. Тудо эмлымверыш логалмем нерген паленат огыл. Таче пашаш кайымем годым машина йымаке изиш гына шым логал манын каласкалаш тӱҥале. Тунам омем шарналтышым. Арам огыл йолташ ӱдырем дене коктынат ик кечыште шочынна.
Элина.
Йошкар-Ола.