Самырыкше годым кокам паша дене Кубаньыш каен да туштак илаш кодын. Ийлан ик гана тудо шочмо велыш толын кая. Тунам уло родо-тукымна дене погынена, тӱрлым кутыркален шинчена. Ик тыгай вашлиймаш годым кокам пошкудыж дене лийше историйым каласкалыш…
Тунам Степан вийвал пӧръеҥ лийын. Станицыште (Кубаньыште ялым тыге маныт) тудым виян да тале пашаеҥлан шотленыт. Кидше чыла сомыллан келшен толын. Анфиса пелашыжат пеш шыма да мотор ӱдырамаш улмаш. Ик кечын Степанлан плотник бригадым вуйлаташ ӱшаненыт. Пӧръеҥ шке пашажым шот да рат дене шуктен. Ты бригадыште Малика лӱман пошкудо ӱдырамашын Йыван эргыжат лийын. Рвезе пашам ышташ йогыланен, садлан Степан тудым весе-влак ончылно чӱчкыдын вурсен.
Икана Степан паша гыч путырак ярныше пӧртылын. Вакшышыш пыкше йӧрлын.
– Нимоат огеш коршто, а пуйто вий уке. Эсогыл кӱпчык гыч вуйымат нӧлтал ом керт. А чонлан тугай йӧсын, шучкын чучеш, – ойлен пӧръеҥ.
Пелашыже, вийдыме марийжым ужын, чот лӱдын, мом ыштышашым пален огыл.
– Мо коршта, шӱмбелем? – уэш-пачаш йодын.
Степан шке семынже ала-мом умылаш лийдымын гына вудыматен. Ик жап гыч тудо шӱлышым йомдараш тӱҥалын.
Тунам Анфиса трукышто пуйто ала-мом шарналтен. Вашке гына кӱмыжыш вӱдым темен. Тудым пелашыжын вакшышыж воктек шынден. Вара шырпе-влакым почела ылыжтен, вӱдыш кышкен, шке семынже пелешткален. Шырпе-влак вуй дене вӱд йымаке волен каеныт. Икымше, кокымшо, кумшо, нылымше…
Степан вакшышыште тугак тарваныде киен. Нылымше шырпын вӱд йымак кайымекыже, пӧръеҥ ушым налме гай лийын. Пелашыже ночко лапчык дене чурийжым йыген. Тунамак Степанын капшылан куштылгырак чучын. Укшинчыш толын. Степанын умшаж гыч ондак шем вӱд, вара ӱп ала меж моклака лектын возыныт.
Пӧръеҥ тетла нимомат шарнен огыл. Эрлашыжым ватыже тудлан каласен:
– Юмылан тау, таза улат. Тыйым пеш чот локтеныт улмаш. Ныл шырпе вӱд йымаке почела кая гын, айдеме кола маныт. Йӧра, жапыштыже чыла умыленам да полшен кертынам. Изиэм годым нине шомак-влакым ковам каласен коден, тудо еҥ-влакым эмлен моштен…
Тылеч вара Степан вашке тӧрланен. Но Анфиса дене ӱмыр мучко пырля лияш пӱрен огыл улмаш. Ӱдырамаш трукышто нелын черланен да илыш дене чеверласен.
Станицыште тыгай шомакат коштын, пуйто марийжым утарышыжла, Анфиса шке ӱмбакыже осалым налын. Тиде чын але уке, мужедаш веле кодеш.
Елизавета.
Йошкар-Ола.