Икана изиэм годым ача-ава дене пырля шӱгарлаш кайышна. Ик жап коштмеке, пытартышлан ковамын шӱгарышкыже мийышна. Тудын дене улмына годым шинчамлан воктенысе шӱгар оҥа пернен. Тушто самырык рвезын картычкыже лийын. Фотосӱрет лавырген пытен, садлан кӱсенем гыч нершовычым луктынам да пуракым ӱштылынам. Вара нершовычем угыч кӱсенышкем пыштенам да тудын нерген йӧршеш монденам.
Жап эртымек, омым ужынам, пуйто ала-могай палыдыме рвезе мыйым шкеж деке кид дене ӱжын. Ончалтышыже ала-молан моткоч шучкын чучын. Тиде рвезе икмыняр йӱд почела омешем кончен. Малаш возашат лӱдынам, тидын нерген авамлан ойленам. Тудо мыйым черкыш бачышка деке наҥгаен. Шоҥго черке пашаеҥ мыйым вуем гыч ниялтен да йодын:
– Шукерте огыл тый шӱгарлаш миенат. Тушеч пеленет нимом конден отыл?
– Нимомат налын омыл, лач нершовычем дене рвезын картычкыжым ӱштылынам, – манынам.
– Нершовычет пелен шӱгарла рокым конденат, тудым мӧҥгеш тушко намиен кодо, – каласен бачышка.
Авам ден ачам тудо кечынак нершовычым шӱгарлаш наҥгаен коденыт. Тетла мылам тиде шучко омо кончен огыл.
Нина.
Советский район.