Кеҥеж жапым пайдалын эртараш манын, студент але кугурак класслаште тунемше-влаклан мутвундым пойдараш полшышо икмыняр йӧн дене палдарена.
1. Сылнымутан книгам утларак лудса.
Кажне тылзын тӱрлӧ жанр дене возымо ик книгам лудса. Оҥай, келшыше ойсавыртыш-влакым возен лукса да шарнаш тыршыза. Мом лудмо нерген лишыл йолташлан але ача-авалан каласкалыза. Тыгак аудиокнигам але подкастым колышташ лиеш.
2. Уто, кӱлеш-оккӱл мут-влакым кучылтмым чарныза.
Кутырымо годым «э-э-э», «ну» да тулеч моло уто мут-влак ойдам шӱктарат. Тыгак йот йылме гыч пурышо уто шомак-влакым чӱчкыдын кучылтмо сай огыл. Шке кутырымыдам диктофоныш але видеош возыза да экшык-влакым эскерыза.
3. Палыдыме мут-влакын мом ончыктымыштым рашемдыза.
Кажне арнян иктаж 2-3 у шомакым пален налаш тыршыза. Кутырымо годым нине мут-влакым кучылтса.
4. У еҥ-влак дене палыме лийза.
Иктаж у верыш миен толза, еҥ-влак дене тӱрлӧ темылан мутланыза. Кажне айдемын мутвундыжо шкешотан. Мутлан, шоҥгыеҥ-влак деч мондалтше мут-влакым шуко пален налаш лиеш.
5. Иктаж йот йылмым тунемза.
Кажне кечын 3 йот мутым шарнаш тыршыза. Тыге вуйдорык сайынрак пашам ышташ тӱҥалеш.
6. Кажне кечын иктаж-мом возыза.
Мутлан, дневникым але соцкылыште лаштыкым вӱдыза. Тушко шке шонымашдам але иктаж историйым серыза. Кид дене возымо уш-акылым вияҥдаш полша.
7. Почеламутым, ушан ой-влакым шарныза.
Кажне кечын ик калыкмутым да почеламутым тунемза. Вес кечын тудым уэш ушештарыза.
8. Пайдале модыш дене модса.
Мутвундым пойдараш модыш йӧнымат кучылташ лиеш. Мутлан, алфавитын почела шогышо икмыняр букваж дене предложенийым чоҥыза але ик мутлан синоним ден антонимым кычалза.
Тыгак ребус, крос-сворд-влакым решатлыза.