Институт деч вара вигак марлан лектынам. Пелашем верысе воинский частьыште кок ий служитлыш, вара тудым вес олаш кусарышт. Ик тылзе гыч мыят йӧршеш палыдыме верыш илаш кайышым.
Часть изирак посёлко воктене верланен, тораште огыл кугу чодыра шоген. Йырваш тымык да ласка лийын. Ик тылзе гыч школыш пашаш пурышым. Илыме верна гыч школ марте изирак чашкер гоч эртыман. Шошым да шыжым тыште кайык-влак чарныде муреныт, тӱрлӧ поҥго, емыж кушкыныт. Лач телым гына изиш пычкемышрак чучын.
Ик тыгай кечын школышто шукырак шинчылтым. Теле кече пеш кӱчык, вашке пычкемышалтеш. Пырля пашам ыштыше-влакат чылан каен пытеныт. Пелашем службо гыч ик шагат гыч гына толеш, садлан шкетак каяш тарванышым.
Уремыште лум лумеш, йолгорным петыра. Чашкер дек лишеммем годым чонлан ала-молан шучкын чучо. Лӱдмем сеҥен, ончыко ошкыльым. Трук пушеҥге кокла гыч кок йӱшырак пӧръеҥ койылалтыш, мылам тӱрлӧ кӱлдымашым кычкыраш тӱҥале. Верыштем тошкышт шогем, ик мутымат пелешташ ом тошт, а нуно койын лишемыт. «Мухтар, тол тышке!» манын, уло йӱкын кычкыральым. Пуйто тораште огыл пием уло, тудым ӱжам.
Пӧръеҥ-влак ӧрмалген чарналтышт. Эше ик гана «Мухтар!» манын кычкыральым. Молан лач Мухтар? Шарнем, изи годым ковамын тыгай пийже ыле. Овчарке урлык.
Трук чашкер кокла гыч пий кудал лекте да йол воктекем толын шогале. Ӧрмем дене тевак лумыш шинчам. Пий йӱшӧ-влак ӱмбак ырлаш тӱҥале. Нуно, лумым келын, ӧрдыжкӧ ошкыльыч. Мый верем гычат тарванаш ом тошт. Кузе лияшат ом пале. Эркын мӧҥгӧ могырыш ошкылаш тӱҥальым, пий почешемак кая. Тыге чашкерым коктын лекна. Можыч, тудо озадыме, лӱмжым колынат, кудал лектын, шоналтышым. Подъезд дек миен шумеке гына чонем пурымо гай лие. Пийым вуйжо гыч ниялтышым да пелештышым:
– Тау, Мухтар. Тый мыйым утарышыч. Изиш вучалте, чечас мый тылат киндым луктын пуэм.
Тошкалтыш дене кумшо пачаш марте куржын кӱзышым, киндым налын лектым – пий уке. Кычкырышым, но тудо ыш тол.
Тетла тудым ик ганат ужын омыл. Кызыт тидым шарналтемат, можыч, тиде пий огыл, а аралтыш суксем лийын манын шонем.
Светлана.
Киров область.