Выньыкым тичмаш тылзе годым погыман. Тунам тудо тазалыклан пайдам утларак конда.
6 июльышто погымо выньыкыш эм шудо-влакым ешараш гын, тудо поснак ю виян лиеш.
Таза лияш манын, куэ выньыкыш икмыняр тумо укшым ешараш кӱлеш.
Шинча вочмо деч аралалташ манын, куэ выньыкыш ик кож укшым пышташ лиеш.
Выньыкым тошто, черле, йӱлышӧ пушеҥге гыч погаш огеш йӧрӧ. Тыгак ик вож гыч кок пушеҥге лектеш гын, тушеч выньыкым погаш сай огыл.
Мончаште кырыме годым выньык трукышто шалана гын, лишыл жапыште тӱрлӧ кырча-марча туткар лиеш.
Ик выньык дене мончаш икмыняр гана пураш ок келше.
Самырык еш пиалан лийже манын, ожно сӱан деч вара арама выньык дене мончаш пуреныт. Тидлан вӱд воктене кушшо шым арама гыч ик укш дене налыныт да выньыкым ыштеныт. Ондак ты выньык дене пӧръеҥ кырен, вара – ӱдырамаш.
Пий оптымо годым выньыкым погаш огеш йӧрӧ. Тудо тазалыклан эҥгекым конден кертеш.
Выньыкым мӧҥгӧ пурташ огеш лий, тудым мончаончылно аралыман.