27 майыште Шернур посёлкысо рӱдӧ библиотекыште «Библиойӱд» мероприятий годым Токтаровмыт еш дене
усталык вашлиймаш эртен. Марий тӱвырам да ӥӱлам пагалыше, усталык шӱлышан ты ешым шукын палат.
Татьяна ден Александр 2017 ийыште мужыраҥыныт. Татьяна Пошкырт кундем Мишкан район Чорай ялеш шочын. Александр – Шернур район Тоски ялын эргыже. Нуно коктынат «Эрвел марий» мурышо да куштышо ансамбльыш коштыныт, туштак палыме лийыныт, келшаш тӱҥалыныт.
Кызыт еш Шернур посёлкышто ила. Пиалан мужыр Элика ден Элави ӱдыр-влакым ончен кушта. Нуным изинек марий йылмым, тӱвырам пагалаш туныктат.
А.Токтаров Шернур районысо образований пӧлкаште программистлан пашам ышта, «Пӧлек» калык фольклор ансамбльыш коштеш. Татьяна пелашыже – англичан йылмым туныктышо, самырык поэтессе. Декретыш лекме деч ончыч Оршанке район Тошто Крешын школышто англичан йылмым туныктен.
Усталык вашлиймаш годым Татьяна ончаш толшо-влакым «Кандырам», Алабуга вел марий куштымаш-влакым кушташ туныктен. Тыгак «Эрвел марий» ансамбльын репертуарже гыч икмыняр мурым йоҥгалтарен, шке возымо почеламутшо-влакым лудын.
Вашлиймашыш толшо кажне еҥ Токтаровмытын еш архивыштышт аралалтше тошто марий вургем-влакым, сӧрастарыме ӱзгарым, марий сынан йоча модыш-влакым, книгам, сӱретым, тӱрлӧ калык вургеман курчак коллекцийым ужын кертыныт. Икмыняр модыш ден йоча вургемым Татьяна шке пидын.
Мероприятий годым йочам марий шӱлышеш ончен куштымо нерген мутланеныт, вет чылажат еш гыч тӱҥалеш. Шочмо йылмым, тӱвы-рам пагалыше ача-авам ончен, йоча-влакат тыгаяк лийыт манын, ӱшаныме шуэш.