Тиде историй йолташ ӱдыремын коваж дене лийын. Тунам Таис вич ийым гына эрталтен улмаш. Ик кеҥеж кечын шинчагомдышыштыжо шуко кугу шыгыле лектын, эсогыл шинчажым почын кертын огыл. Ялысе фельдшер эмлыме шотым муын огыл, садлан Марпа аваже ик шоҥго ковай деке полышым йодын миен.
Анук ковай изи ӱдырым пӧрт шеҥгекыже наҥгаен, шуко жап шке семынже кумалын, шинчашкыже ала-могай лапчыкым оптен. Тылеч вара эмлыше кова деке эше икмыняр гана толыныт. Пытартыш гана мийыме годым кова икмыняр тыгыде оксам пуэн колтен. Тудым жапын-жапын черле ӱдырын шинчагомдышышкыжо пышташ, вара мландыш урен опташ кӱштен. Кӱштымӧ семын ыштымек, шыгыле-влак чынжымак йомыныт.
Молан тыге лийме нерген Анук ковай Марпалан йыштак каласен улмаш. Ӱдырлан локтымо кочкыш йоҥылыш логалын. Ялысе ик ӱдырамаш Таисын ачаж деке пижедылын, пӧръеҥым еш гыч наҥгаяш шонен. Осал ӱдырамаш Марпалан локтымо олмам пуэн. А тудыжо ты пӧлекым, шоныде, изи ӱдыржылан кучыктен.
Тунамак Анук ковай Таислан шудо ӧлтӧм пуэн да тудым эрдене эр корнывожышто ӥӱлаташ кӱштен. Вара ты вер гыч, савырнен ончыде, писын каяш кӱлын. Осалым ыштыше еҥ ты кечынак иктаж-мом йодаш толеш манын шижтарен. Тыгодым сурт гыч нимом пуаш шӱден огыл.
Тудо кечынак кок пӧрт гоч илыше шкет ӱдырамаш кешырым йодаш толын. Марпа тудым вурсен колтен. А кастене ты ӱдырамаш эмлымверыш логалын. Таисын ачажат титакше нерген шкеак каласен, проститлаш сӧрвален.
Валентина.
Йошкар-Ола.