Тиде заповедник Мурманск областьысе Мончегорский районышто верланен. Тудын кумдыкшо – 278435 гектар.
Заповедникым 1930 ий 17 январьыште почмо. Кугу Отечественный сар годым ты верыште фронтовой линий эртен, садлан чодырам ятыр руымо. 1985 ийыште гына Лапландский заповедниклан уэш официальный статусым пӧртылтымӧ.
Заповедник кумдыкышто чылаже вич курык, икмыняр вӱдшуҥгалтыш, тундр, ер улыт. Эбр-чорр лӱман вӱдшуҥгалтыш телымат огеш кылме. Ты вер шке чодыраж дене чаплана. Тыште 400-600 ияш лапландийысе пӱнчӧ ден сибирский кож-влак кушкыт. Пелганде тӱсан филлодоце пеледыш заповедникын эн мотор кушкылжылан шотлалтеш. Тыште 31 тӱрлӧ янлык, 198 тӱрлӧ кайык илат. Нунын коклаште – йӱдвел пӱчӧ, маска, пире, рожамак, норвежский лемминг да молат.
Чунозеро ер воктене Йӱштӧ Кугызан илемже верланен. 1964 ийыште тиде кундемыште «Морозко» фильмым сниматленыт.