Ты курыкын ик ужашыже Адыгей Республикыште, весыже Краснодар кундемыште верланен. Воктеныже Малая Лаба ден Белая эҥер-влак йоген эртат. Курыкын кӱкшытшӧ — 2368 метр. Адыгей йылме гыч кусараш гын, «Тхач» «Юмо» манме лиеш. Верысе калык тудым эше Чара курык манеш. 1999 ийыште Адыгей велне улшо курык ужашыште «Большой Тхач» пӱртӱс паркым ыштеныт. Тушто тумо, шоло, шопке, нӧлпӧ, ваштар, пел курымаш нулго-влак кушкыт.
Курыкын ик могыржо лапкарак. Тушто «Йошкар книгаш» пуртымо 80 шудо, пеледыш шочыт. Вес могыржо тура, кӱан. Ты курыкышто 20 наре карстовый пещер уло.