Мый изинек улан илаш шоненам. Йоча жапыште окса чӱдылыклан кӧра родо-влак деч кодшо вургемым чиенам, тошто курчак, модыш дене модынам.
Авам мыйым шкет ончен куштен. Шарнем, икана йолташ ӱдыремлан Барби курчакым пӧлекленыт ыле. Тудо мылам тӱняште эн мотор курчакла чучын. Авам деч шочмо кечемлан тыгайымак йодынам. А тудо мылам шке пидме курчакым гына пӧлеклен.
Тудо кече чоныштем кочо шарнымашым коден. Молан моло ӱдыр-влакын чыла уло, а мыйын нимоат уке манын, чот шортынам. Авам ден ковам мыйым нигузеат лыпландарен кертын огытыл. Тунамак шкаланем пеҥгыдын каласенам: кугу лиямат, пашам ышташ тӱҥалам, шкаланем чапле деч чапле вургемым налам, эн тамле кочкышым кочкаш тӱҥалам да иктаж кум Барби курчакым налам.
18 ийым темымек, вигак пашаш пуренам. Икымше пашадарем нимо деч чот вученам. Вара вигак кевытыш чапле вургемым налаш каенам. Икымше шийвундем ик юбко ден блузкылан гына ситен. Туге гынат мый тӱняште эн пиалан лийынам. Илышыштем икымше гана чонемлан келшыше вургемым налынам.
Тыге кажне пашадарем ик-кок кечыште кучен пытаренам. Авамлан кочкышым налаш але пачерлан тӱлаш полшаш кӱлмӧ нерген тунам ик ганат шоналтен омыл.
Жап эртыме семын пашадаремат ешаралтын, у должностьыш вонченам. Тунам кажне пашадарем гыч оксам шапашлан опташ тунемынам.
Икана авам дене 8 Март вашеш кевытыш тарванышна. Авамлан пайрем тувырым кычална. Мый тудлан я ик, я вес кевытыш пураш темленам, а тудо шулдаканрак сатум кычалын. Ик кевытыш авамым виешак пуртышым. Тудо канде тӱсан платьым чийыш. Тудын ӱмбалне тувыр моткоч моторын койын. Авамын йӱлышӧ шинчажым, шыргыжмыжым ужын, мыйынат кумылем нӧлталтын. Акшым ончалмек, авамын кумылжо йомо. Тувырым вашкен кудаше да вес вере ошкыльо. Тунам мый, авамлан каласыде, тиде платьым шыпак нальым. Шапашлан погымо оксам лачеш лие.
Вес кечын авам пайремыш каяш тарваныш. Тошто тувыржым чияш пиже. А мый тудлан йыштак вӱдылкам шуялтышым. А туштыжо лачак канде тувыр киен. Авам ондак ӱмбакем ӧрынрак ончале. Вара шӱргыж мучко шинчавӱд йоген волыш.
– Тиде кушеч? Кузе? Уло пашадаретым тудлан пытаренат мо?
– Авай, пиал окса дене ок висалт. Пиал дене темше шинчат, шыргыжмет – таче мыйын эн кугу поянлыкем!
Ынде мый палем, лишыл еҥын куанже кок пачаш шуко куаным конда.
Лариса.
Йошкар-Ола.