Мый 35 ияш улам. Можыч, тыге пӱралтын, можыч, иктаж вере шкежат титакым ыштенам, но кызыт пелашем уке. Мый тудым утыжым омат кычал манаш лиеш. Южгунам гына интернетыште палыме лийме сайтыш пурен лектам. Тушто ойырлышо але утыждене самырык-влак утларакшым шинчат. Келшыше еҥ-влак дене икмыняр гана вашлиймашыш миенам, но ала-молан нигӧат чонеш пижын огыл. Шукынжо жапым веселан эртараш гына шонат.
Шукерте огыл черетан каче деч серыш тольо. 39 ияш, тӱжвал тӱсшӧ дене келшыше, весела пӧръеҥ. Бизнесмен улмыж нерген вигак увертарыш. Илыш пелашым кычалам манмыже кумылемым савырыш.
Палемдыме кечын рестораныште вашлийна. Андрей чапле машина дене толын шогале. Шкежат лач фотосо гаяк мотор. Мутланымыжат, илыш нерген шонкалымыжат келшыш. Ресторанысе ак шергырак чучо гынат, йӧратыме салатем ден пирожныйым нальым. А Андрей шылым, тӱрлӧ закускым кочко. Кас мучаште Андрей чекым пелыгыч тӱлаш темлыш. Ӧрмем дене тевак оҥылашем ӱстембак волен возеш. Тыгайым але марте ужын омыл ыле. Кумылем чотак волыш гынат, келшышым.
Андрей мыйым мӧҥгӧ марте ужатыш. Эрлашыжым адак йыҥгыртыш. Мый телефоным шым нал. Пӧръеҥ икымше вашлиймаште шкенжым тыге кучышаш огыл манын шоналтышым. Кастене Андрей угыч интернетыште серышым возыш:
– Тый мылам келшенат. А чек тергымаш гына лийын. Айда вашлийына.
Тиде серыш ондак мыйым чот сырыктыш. Могай эше тергымаш да монь? Ме вет 18 ияш огынал манын, шыдын шоналтышым. Тыгодымак ала-молан тудым угыч ужмем шуо. Кӱчык вашмутым возен колтышым. Кок арня олаште ом лий манын ондалышым.
Икана вашлийме дене айдемым тӱрыснек умылен, пален шукташ огеш лий, конешне. Тидлан жап кӱлеш. Но чек чоныштем ала-молан кочо шарнымашым коден. Умбакыже Андрейлан ӱшанен кертам але уке?
Эльза.
Йошкар-Ола.