Шыжым кидым уремыште юалге да йӱр деч, а пӧлемыште (шокшым пуымо тургым тӱҥалмеке) утыждене кукшо юж деч аралыман. Кид коваштым вӱдыжтараш да пайдале вещества-влак дене пойдараш икмыняр йӧным темлена.
– 400 мл шӧрым 40-50 градус марте ырыктыза, тынарак леве вӱд дене варыза. Тушко чывыштыш корицым да 2 кугу совла оливке ӱйым ешарыза. Тыгай вартышыште киддам 15 минут кучыза.
– 2 кугу совла сакырложашым, 1 кугу совла нӧшмӱйым, чывыштыш содым, 1 кугу совла роза пеледыш вӱдым варыза. Тыгай пилингым кидыш массажым ыштыме семын йыгыман.
– 1 муноптемым, 1 кугу совла кокос ӱйым, 1 изи совла мӱйым сайын варыза. Маскым кидыш йыгыза да 15 минут гыч леве вӱд дене мушкын колтыза.