Варвара кугезе ковамым пӧрт пырдыжыштыже кечыше фотож почеш гына шарнем: кужу капан, чатката чурийвылышан, вуйыштыжо – лум гай ош шовыч. Тудо арулыкым да чыла шотыштат порядкым йӧратыше ӱдырамаш лийын, маныт. Авамын марлан лекмекыже, олашке чӱчкыдын унала толын, мыйымат ончаш полшен.
– Кугезе коват ял гыч эре шуко костенечым конден. Сумкажым ястара, вургемым вашталтен чия, ош шовычым пидеш да тый денет модаш тӱҥалеш ыле. Пеш ушан-шотан, чулым ӱдырамаш лийын, – каласкален авам.
Икмыняр ий ончыч июльышто ковам деке унала ялыш кудальым. Кас велеш миен шуым. Уремыште лӱп-лӱп шокшо, йолташ ӱдыр-влак дене эҥерыш йӱштылаш куржна, олык мӧрым шер теммеш кочна. Мӧҥгӧ кас велеш гына толын пурышым. Ковам кужун коштмемлан шылтален нале. Кас кочкышым ыштышна да малаш вочна.
Омым ужам. Пуйто уремыште – пич йӱд. Мый ковамын суртшо воктене шогем, пураш тӧчем, капкам петырыме. Капка гоч пыкше кӱзышым. Пӧртӧнчыл омсат петырыме. Окнашке тӱкалем, чечас ковам ужешат, почеш манын вучем. Трук окнаште ош шовычан кугезе ковам койылда. Кошарварняжым кӱш нӧлталын рӱзалта да пелешта:
– Тетла ӥӱд марте ит перныл. Почешет коштын, чылт ярнен пытышым!
Помыжалтмекем, омем ковамлан каласкалышым. Тудо шовыч лукшо дене шинчавӱдшым ӱштыльӧ да пелештыш:
– Алят суртышто порядкым эскера, ужат. Ондак аватын, кастене уремыш лектын кайымыжым ужын, толмешкыже ок мале ыле. Эре окна ончылно вучен шинчен. Теве тыйын верчынат тургыжлана. Кугезе коватын мутшым шотыш нал, тӱткырак лий.
Наташа.
Йошкар-Ола.