Илышыште кажне еҥ пиалан лийнеже. Мыйын пиалем – изи чон падыраш Ванюш эргым. Тудым ончен, кажне кечын Юмылан тауштем. Изи кидше дене шӱй йыр ӧндалын кучымыжо, шыман шупшалмыжак мом шога! Тӱняште эн пиалан ава улам. А вет эше вич ий ончыч чылажат вес семын савырнен кертеш ыле…
Тунам мылам 22 ий лийын. Эн пиалан, весела самырык тат. Университет деч вара вигак пашаш пурышым. У коллективыште утларакшым пӧръеҥ-влак пашам ыштеныт. Тидыже изиш лӱдыктен. Ик тылзе гыч мыйым кок арнялан вес олаш командировкыш колтышт. Пеленем кугурак опытан специалист Юра кайыш.
Юра – пеҥгыде капкылан, весела шинчаончалтышан пӧръеҥ. Тӱжвал тӱсшым ончен, тудлан 40 ийым пуаш огешат лий. Чылт качымарий. У паша верыш толмеке, ондак тудым вашлийым.
Яра жапыште Юра мыйым ола мучко экскурсий дене коштыктыш, тӱрлӧ оҥайым каласкалыш. Пеленже моткоч веселан да куштылгын чучын.
Мӧҥгӧ пӧртылмек, чонем йокрокланаш тӱҥале. Молан тыге лиймым нигузе умылен кертын омыл. Вара тогдаенам: кок арня жапыште Юрам йӧратен шынденам. Ида шоно, тунам коклаштына нимо тугай лийын огыл…
Кажне кечын пашаш орадыла вашкенам, тудым вашкерак ужаш шоненам. Пеленже чонем йочала юарлен. Лач тудо гына пуйто нимом шижын огыл.
У ий корпоратив годым Юралан йӧратымашем нерген каласышым. Йӧратымемын ончалтышыштыже ӧр-машым, умылыдымашым ужым.
– Тый чоныш логалше мотор, шыма ӱдыр улат, – ойлыш Юра. – Но мый тыйым пиаланым ыштен ом керт.
Тыгай мут-влакым колмеке, чонем кӱзӧ дене пӱчмыла чучо. Вуем йӧратымаш аҥыртарен. Шортын, Юрам пеленем лияш сӧрвалышым. Ты кастене подылшырак Юрам сымыстарен кертым…
Эрдене тудо пеҥ-гыдын каласыш:
– Ме пырля лийын огына керт. Тиде йоҥылыш нерген мондаш йодам. Проститле. Тетла тыгай нигунам огеш лий.
Тылеч вара Юра лишкем ик ганат миен огыл. Пашаштат пуйто мый дечем шылын коштын. Кок тылзе гыч мӱшкыран улмем нерген пален нальым. Куанымем дене чыла Юралан каласышым.
– Йочам кодаш але уке, шке шоналте. Мый тудлан сай ача лийын ом керт. Тиде йӱд – мыйын кугу титакем, – пелештыш йӧратымем.
Сырымем дене азам кудалташ шонен пыштшым. Эсогыл врач денат кутырен келшышым, ямдылалтым, но жапыштыже чарнен шогальым.
А кызыт тидын нерген шоналташат шучко. Мыйын йӧратыме еҥем деч йӧратыме икшывем уло. Тиде пиал огыл мо?! Шукынжо мыйым огыт умыло, титаклат, ватан пӧръеҥ деч йочам ыштымемлан вурсат. А мый ик пырчат ом ӧкынӧ, вет ава лияш пиал чылаштлан огеш пуалт.
Светлана.
Йошкар-Ола.