Шернур посёлкышто шочын-кушшо Диана Парсаева Йошкар-Оласе
1-ше номеран школышто тӱҥалтыш класслам вич ий наре туныкта.
– Ондак психолог але ветеринар лияш шоненам. А МарГУ-со педагогике ден психологий факультетыш тунемаш толмек умыленам: мылам икшыве-влак дене пашам ышташ келша.
Тӱҥалтыш класслам туныкташ – кугу ответственность, поснак самырык туныктышылан. Тидлан шуко тӱткыш, чытыш кӱлыт. Икшывын кумылжым умылен моштыман, тыгодым шкендын пеҥгыдылыкымат ончыктыман. Южгунамже йоча ончылно артист семынат кояш логалеш.
Кызыт 3-шо классым туныктен луктым. Тунемше-влак дене тӱрлӧ выставкыш, экскурсийыш лектын коштына, чон почын мутланена. Кеҥежым школ пелен йоча лагерьыште, тыгак «Журавушка» лагерьыште пашам ыштем, –
ойла Д.Парсаева.
Тылеч посна Диана ментальный арифметике дене занятийым эртара.
– Репетитор семын шым ий пашам ыштем. А ментальный арифметикым шукерте огыл туныкташ тӱҥалынам. Тидлан цифровой педагогике дене ешартыш шинчымашым налынам. Тиде дисциплине писын шонен да шотлен мошташ туныкта. Тудын полшымыж дене тунемше-влак почеламутым сайынрак шарнаш тӱҥалыт, сценыште але доска ончылно выступатлаш лӱдмым чарнат, – манеш Диана Сергеевна.
2020 ийыште Д.Парсаева самырык туныктышо-влак коклаште эртаралтше «Педагогический дебют» республикысе конкурсышто шке вийжым терген ончен да финалист радамыш логалын. А шукерте огыл коллеге да йолташыж-влак дене пырля ава-влаклан «Mama off» клубым чумырен. Тудо тений январьыште пашам ышташ тӱҥалын.
– Мемнан клубыш тӱрлӧ ийготан ава-влак коштыт. Тыште ме психолог, нутрициолог, косметолог дене вашлиймашым эртарена. Каныш кечылаште тӱрлӧ мероприятийыш коштына. Мутлан, шукерте огыл профессионал фотосессийым эртаренна, гимнастикыш миенна да бачатым кушташ тунеммынна. Икманаш, мемнан клубыш толын, ава мӧҥгысӧ сомыл деч каналташ тунемеш, шкаланже у йолташ-влакым муэш. Арам огыл ойлат: еш пиал ӱдырамаш деч шога. Тудо пиалан гын, икшывыжат, пелашыжат пиалан лийыт, – каласкала Диана.
Самырык туныктышын яра жапше шагал гынат, Диана кидпашам ышташ, книгам лудаш йӧрата. Тудо кажне кечын ала-мом ум пален налаш тырша. Теве шукерте огыл йоча-влаклан каллиграфий курсым вӱдаш тӱҥалын.
Туныктышо ӱмыржӧ мучко тунемеш манме шомак Дианалан келшен толеш. Тек тыгай чолга, чон йӱлен пашам ыштыше самырык туныктышо-влак шукырак лийыт.