Ты парк Коран эҥер деч тораште огыл верланен. Тудын кумдыкшо – 30 тӱжем гектар. Тушеч 217 гектарым ер-влак айлат. Тыште 16 кугу карстовый ер, икмыняр сӧрал вӱдшуҥгалтыш, 32 пещер улыт. Паркыште йӱштылаш, колым кучаш, тулым ылыжташ огеш лий.
Национальный парк лӱмым заповедниклан 1949 ийыште пуэныт. Паркын кугу ужашыже курык коклаште верланен. Эн кӱкшӧ (1280 метр) верже – Мала Капела курык. Кеҥежым паркысе ерлаште вӱд 24 градус марте ыра. Кажне ерыште икмыняр вӱдшуҥгалтыш уло.
Паркыште 1267 тӱрлӧ кушкыл кушкеш. 75 кушкыл лач тыште гына вашлиялтеш. Тыште бук ден нулго кожла ятыр ий гӱжлен шога. Чодыраште пире, маска, шурмаҥше, пӱчӧ, ирсӧсна, косиля, кома, шоҥшо, луй, тӱрлӧ кишке илат. Ер ден эҥерыште форель ден рак ятыр улыт.