Ачам ден авам шым ияш улмем годым ойырленыт. Тӱҥалтыште ачам школ дек чӱчкыдын толын, шоколадым але печеньым конден. Авамлан тиде келшен огыл, тудо мыйым эре вурсен. Мый чӱчкыдын шортынам, ачамын молан посна илымыжым умылен кертын омыл.
А вара авам дене вес вере илаш кайышна. У ола, у школ. Чылажат палыдыме, йот. Шижынам, авамланат куштылго лийын огыл.
Кумшо классыште тунеммем годым авамын вес пӧръеҥ дене келшымыжым пален налынам. Семён чӱчӱ авамым поген налеш манын лӱдынам. Вет тӱняште эн лишыл айдемем авам гына лийын.
Лу ияш улмем годым Петя шольым шочын. Тудо мылам утыла чучын. Авамым тудлан чот ушкаленам, шуко шортынам. Тӱрлӧ амалым муын, мӧҥгӧ гыч лектын каенам, уремыште але кудывечыште перныл коштынам. Тетла авам дене ончычсо гай ик ганат чон почын мутланен омыл. Школым вашкерак тунем пытараш да иктаж-кушко тораш тунемаш каяш шоненам.
Аттестатым налмек, шонымо семынак ыштенам. Тиде уверым авамлан куанен ойленам, тудым лӱмынак сырыкташ шоненам. Авам шортын сӧрвален гынат, шонымашем деч кораҥын омыл.
Адак – палыдыме ола, у вер-влак. Чонемлан утларак неле лийын. Авам чӱчкыдын йыҥгыртен, но мый телефоным пеш шуэн налынам.
Икана палыдыме номер йыҥгыртен. Семён чӱчӱ авамын эмлымверыш логалмыж нерген увертарен. Мый вигак корныш тарваненам. Авам коронавирус дене чот черланен, туддеке нигӧм пуртен огытыл. Кок арня реанимацийыште киен. Мый кажне кечын Юмылан кумалынам, авам илыже гына, тетла нигунамат тудым ом шӱлыкаҥдаре манын шоненам.
Тиде неле пагытыште Петя, Семён чӱчӱ, мый икте-весе деке пуйто лишкырак лийна. Ончычсо ӧпкемат мондалте.
Авам черым сеҥыш. Эмлымвер гыч тудым чылан пырля вашлийна. Икте-весым ӧндалын, чон лушкымеш шортна.
Тыге неле пагыт лишыл еҥым утларак аклаш туныктен. Авам – эн шерге айдеме, тудын йӧратымашыже илыш корнем волгалтара.
Лариса.
Морко район.