Салам лийже, «Ӱшанем… Вучем…» лаштыкым лудшо йолташ-влак. Тошто кагаз-влакым лончылен шинчымем годым кидышкем авамын серышыже логале. Тудлан ынде 20 ият лиеш дыр.
«Йӧратыме эргым!
Тыйым моткоч шукертак ужын омыл. Кузе илет? Иктаж гана кеч ик кечылан уналыкеш толын кай. Мый тыйын йӧратыме олма когылетым кӱэшт ямдылем. Андрюш, мый тый денет кугешнем. Тунемше, кугу еҥ улат. Палем, пашат шуко.
А мый тугак мӧҥгыштак шогылтам. Шукерте огыл эмлымверыште киен лектым. Но тый ит тургыжлане, мыйын чыла сай. Врач ден медшӱжар-влак «шоҥгемше болт-влакем» ачален колтышт. Ынде илем. Пошкудо Клавий кокат кажне кечын гаяк толын коштеш. Иктым-весым кутыркалена, телевизорым ончена. Жап писынрак эртымыла чучеш.
Маню казам ужалаш логале. Теле гоч пукшен лукташ кургым ыштен шым керт. Ынде теве Клавий шӧрым конда. А мыланем сита, утыжо нимоат огеш кӱл. Тый гына таза лий, чукаем.
Кодшо кечылаште пӧртӧнчыл кӱварын кок оҥажым вашталтышна. Юмылан тау, Ведатын Васлийже полшыш. Сай эрге, пашалан пеш кожмак. Ынде кӱварыште кушташат лиеш.
Андрюш, яра жапет улмо годым йыҥгырте але серышым возен колто. Мый вучаш тӱҥалам».
Авам 15 ий ончыч ош тӱня гыч каен. Возымо серышыже кызытат чонем кочкеш. Аклыза ача-авадам, чӱчкыдынрак унала мийыза. Нуно тендам уло чон дене вучат.
Андрей.
Советский район.