Ожно мыйын кугезе кочам мелиораторлан ыштен. Тудо купым коштымо пашам вуйлатен шоген. Ик ял калык верысе куп верч чот тавадаҥ шогалын. Техникын чодыра дек мийымыж годым нуно трактор ваштарешак лектыныт. Ик кова кугезе кочамлан тунам тыге ойлен: «Ты куп тыглай огыл. Тудо шнуй виян, тушто поро шӱлыш ила. Ты купым коштет гын, уло ешетлан кугу эҥгекым ыштет». Кугезе кочам, планым темыде, вуйлатышын кӱштымыжым шуктыде огеш лий манын умылтарен. Тыге купым коштеныт, чодырам руэныт да олмыштыжо пасум ыштеныт.
Ты историй нерген вашке монденыт. А икмыняр жап гыч кугезе кочам купыш турнявӧчыжым погаш каен да тетла пӧртылын огыл. Тунам кугезе ковам ял калыкын вурсымыжым шарналтен да икшывыже-влаклан тӱткырак лияш ойлен. Тудын шомакшым иктат шотыш налын огыл. Лу ий гыч ешышкына адак кугу ойго толын. Кугезе кочамын кугурак эргыже йӱштылаш пурен да вӱдпӧрдемыш логалын. Тудым утарен кертын огытыл.
Тыге ешыштына икмыняр ийыште вӱдлан кӧра ятыр еҥ илыш дене чеверласен. Ачам ден авамат мыйым вӱд деч чот араленыт. Тидлан кӧра ияш тунемаш изинекак тренер деке коштынам. Но туткар мыйым вес велне кӱтен улмаш. Икана телым, пӧрт гыч лекмеке, леведыш гыч кугу ийсӱс йол йымакем волен возын. Ала-могай вий мыйым тунам колымаш деч утарен. Ийсӱс икмыняр сантиметрлан гына капышкем логалын огыл.
Ий дене кылдалтше эше вес томашат лийын. Икана уремыште йоча-влак лумым вашла кышкен модыныт. Воктечышт эртен кайымем годым иктыже кугу ий моклакам вуйышкем шолен. Вуем чытырналтын, верыштемак волен шинчынам. Эртен кайыше рвезе вашкеполыш машинам ӱжыктен. Тыге ончыкылык пелашем дене палыме лийынна.
Ик жап гыч Эдик мыйым коваж дене палымым ышташ намиен. Ача-ава деч посна кодмекыже, тудым коваже ончен куштен улмаш. Марпа кова еш дене кылдалтше тӱрлӧ оҥай историйым каласкален. Мыят ешыштем лийше вӱд дене кылдалтше туткар нерген ойленам. Тунам тудо мыйым тӱткынрак ончалын да пелештен: «Мемнан тукым лӱмна вӱд дене кылдалтын. Тылат тукымнам шуяш пӱралтын гын, тугеже тыйын ешет вӱд ончылно сулыкшым касарен».
Тыге ойлымыжлан чот ӧрынам. А ик тылзе гыч мӱшкыран улмем нерген пален налынна. Эдикын тукымжым шуйышо эргына шочын.
Ынде ме вӱдын ю вийжылан ӱшанен илена да тудым пагалена.
Надежда.
Киров кундем.