«Звениговский» пеш келшен

Мер кыл управлений гыч налме фото.

Кодшо кечылаште Марий Эл Республикым вуйлатышын пашажым жаплан шуктышо Юрий Зайцев «Звениговский» агрохолдинг предприятийыш миен коштын.

Тудын дене пырля Кугыжаныш Думын депутатше, КПРФ ЦК (Рӱдӧ комитет) Председательын икымше алмаштышыже Юрий Афонин, Марий Элысе ялозанлык да продовольствий министр Андрей Кондратенко лийыныт.

Юрий Зайцев Шолэҥер посёлкышто «Звениговский» предприятийын пашажым ончен, консервым, шылым, колбасам ыштыме цехлашке пурен, шӧр цехыште мороженыйым тамлен ончен. «Звениговский» СПК-н председательже Иван Казанков ыштен лукмо продукцийже дене палдарен. Предприятийыште 130 тӱрлӧ колбасам, 160 тӱрлӧ полуфабрикатым ямдылат. Ю.Зайцев тыгак Морко район Эҥерсола ялыште 3600 вуй ушкаллан чоҥалтше шӧр комплексым, Кугу Шале ялысе фермым, «Звениговский» шыл комбинатым ончен лектын.

Эҥерсола ялыште 750 млн наре теҥгеаш инвестиционный проект почеш паша эркын мучашлалтеш. Тушто 30 паша вер лийшаш, кызыт 15-ше ямде. Вольыкым ашныме комплексын кок корпусшым да кок презе вӱтам чоҥен шуктымо. Тушто тӱжем утла тӱкан шолдыра вольык шога.

Юрий Зайцевын палемдымыж почеш, ялозанлык предприятийым тӱзатымаш республикылан моткоч кӱлешан. Кучем шӧр комплексым чоҥаш, у производствым тӱҥалаш полшышаш.

«Пеҥгыде предприятийым ужым. Тыште кызытсе жаплан келшыше оборудований-влак улыт, у технологийым кучылтыт. Предприятий мылам пеш келшыш. Вияҥаш кугу потенциалже уло. Республикысе ялозанлык предприятий-влаклан полшаш ямде улам. Тыгай производитель-влаклан санкций жапыште поснак полшыман. Пеҥгыде озанлык-влак йотэлысе продукцийым: сырым, шылым, колбасам – шкенан сай качестван кочыкыш сату дене алмаштат», – манын Юрий Зайцев.