Йошкар-Ола гыч самырык кинематографист-влак «Бумеранг» форумышто сеҥыше радамыш логалыныт.
Форум «Орлёнок» йоча лагерьыште эртаралтын. Тушко 57 кино да медиастудий гыч 200 йоча миен. Марий Элын чапшым «ЗУМ» киностудий арален.
Ӱдыр-рвезе-влак шке мастарлыкыштым ончыктеныт, Россий тӱрлӧ кундемже гыч тыгаяк чолга самырык тукым дене палыме лийыныт. Тыгак шоколадлан рекламым да режиссёр, сценарист Татьяна Мирошникын ойлымашыже-влак дене кином войзеныт.
Йошкар-Оласе 29-ше номеран школышто тунемше Наталья Исмакова «За работy оператора-постановщика фильма «День непослушания» и монтаж фильма «Лёгкие деньги», икымше степенян диплом дене палемдалтын.
Йошкар-Оласе 7-ше номеран школышто тунемше Всеволод Горячкин «За создание лучшего рекламного видеоролика» кокымшо степенян дипломым налын.
Йошкар-Оласе 14-ше номеран гимназийын тунемшыже Василиса Фурзикова «За работy продюсера фильма «День непослушания» и монтаж фильма «Лёгкие деньги» кумшо степенян дипломым сулен.
«ЗУМ» киностудийын сайтше гыч налме фото-влак.