Сочиште журналист-влаклан «Вся Россия-2022» XXVI форум 22 гыч 28 сентябрь марте эртаралтын. Тушко Российысе газет ден моло изданийлаште, телевиденийыште, радиопашаште тыршыше тӱжем утла еҥ погынен. Нунын коклаштак Индий, Сербий гыч, Донецк Калык Республик да Херсон область гыч делегат-влак лийыныт.
Форум эртыме кундем – Краснодар край – тений 85 ияш лӱмгечыжым палемда. Тиде амал дене «Как закалялась Кубань» фотовыставкым ончыктеныт. Тыгак Донецк, Луганск республиклаште лийше журналист-влакын фотопашашт дене палдареныт. Донбасс теме посна верым налын: форум жапыште ончыктымо кино, фоторепортаж – чылажат тачысе илышым журналист-влакын ончалтышышт гоч почын пуаш полшат.
Вич кечыште СМИ пашаеҥ-влаклан пеш шуко семинар, мастер-класс, эксперт-влак дене вашлийын мутланымаш, «йыргешке ӱстел» эртеныт. Молгунам тыгай погынымаште тӱҥ теме семын «газет лекташ тӱҥалеш, лудшо лийыт мо?» йодышлан вашмутым кычалаш тыршыме гын, тачысе кечын тиде огеш каҥашалт, чылан ончыкылык нерген гына мутланат. Пашаште лектын шогышо йодышым лончылен, чын корным кычалмаш – чылажат форум деч вара тӱжем дене журналист-влакын ушыштышт кужу жаплан шарналт кодыт, ӱшаным пуэн, пашаште вийым ешарат. А тӱҥжӧ тыгай форум журналист-влаклан тунемаш эртаралтеш: газетнам утларак сайракым ышташ, телерадиопередачым виянракым, ойыртемалтшым ямдылаш кумылышт, йӧнышт, моштымашышт ешаралтше манме шонымаш дене. Сандене тыгай кугу погынымашке миен толаш йӧным ыштымылан Марий Элысе Тӱвыра, печать да калык-влакын пашашт шотышто министерствылан тауштена.
А мом пуэн кертеш форум газетым лудшылан? Тидланат вашмут уло. Ик кечын Россий почтын «Подписка» бизнес виктерын вуйлатышыже Мария Огай лийын ыле. Подписке кампанийым эртараш ме лач тудын дене договорым подписатлена. «Молан мемнан лудшылан газетым жапыштыже намиен огыда шукто, Россий мучко регионлашке 2-3 арня але 2 тылзе вараш кодын веле мия?» йодышым тура шындаш логале. Чыла рашемдымек, улшо нелылыкым тӧрлаш сӧрыш. Чаманаш логалеш, почтын пашаже шотышто Российысе чыла гаяк редакцийын йодышыжо шуко.
Форумышто тыгак Россий журналист ушемын эртарыме конкурсышто ойыртемалтше-влакым саламленыт. Марий Эл гыч эн сай передачым ямдылыше коклашке МЭТР телеканалын журналистше Мария Шавкунова «Рубец» документальный фильмже дене лектын. Тудын деч посна форумышто республикысе Тӱвыра, печать да калык-влакын пашашт шотышто министрын алмаштышыже Михаил Матвеев, Советский районын «Вестник района» газет редакций гыч Вера Кабирова да мый (министерстве тений кум еҥлан миен толаш йӧным ыштен) лийынна, тыгак Россий журналист ушемын Марий кундемысе пӧлкажым вуйлатыше Оксана Старикова миен.
Курорт олаште каныме программе деч поснат ок лий. Репортажым возымо деч вара семинар ден семинар коклаште теҥыз воктене каналташ йӧн пуалтын.
«Тыгай форум тӱнямбалне нигуштат ок эртаралт», – ойла Россий журналист ушем вуйлатыше Владимир Соловьев. Тидлан куанена да журналист-влаклан профессионально вияҥашышт, уш-акылыштым пойдараш йӧным пуымылан тауштена.
Эдуард Иманаев.
