11 апрельыште Йошкар-Олаште Ленин лӱмеш тӱвыра полатыште журналист, марий мыскараче Вера Горохован мыскара касше эртыш. Кас мучко сценыште да залыште весела шӱлыш озаланыш, шонаш таратыше номер-влакат ятыр ыльыч.
Верам сценыште ужде, ты ӱдырамаш мыскараче манын иканаште от шоналте. Тудо «МЭТР» телеканалыште корреспондентлан ышта. Но изиш кутыралтымеке, вигак шижат: мыскараже тудын, руш манмыла, «так и прёт». Южгунам тугай мыскарам луктын пышта, шинчавӱд лекмеш воштылат. А сценыште чылт артист лийын шуын.
Вера Советский район Кельмаксола гыч. Кызытат тыштак ешыж дене ила, пелашыж дене кок эргым ончен куштат. Веран ойлымыж почеш, изиж годсек тудо, мыскарам кучылтын, ешысе тӱрлӧ неле ситуацийым, вурседылмашым куштылемден
кертын. А вара талантым шуараш школ полшен. Вет ӱдыр тусо чыла гаяк мероприятийыш ушнен.
Кугу сценышке корным мемнан газетын эртарыме «Воштылаш, товатат, сулык огыл!» конкурс гыч муын. Школышто тунеммыж годымак 2003 ийыште Вера Петухова (ӱдыр фамилийже) В.Бурлаковын монологшо дене лектын, а вара акаж дене коктын «Автобусышто» сценкым оҥайын модын ончыктеныт да икымше верым налыныт. Тиддеч вара ты конкурсыш тудо ятыр гана толын да шуко тӱҥ призым модын налын. «Ты арвершамычым але луктын шуэн отыл чай? Пудырген огытыл?» – палынем. «Уке. Пашам ыштат. Телевизоржо студент тӱшкагудыштат, мариемын ялысе суртыштат ончыктен. Кызыт ынде мӧҥгыштем почётан верым налын шинча», – шыргыжеш мыскараче.
Тӱҥ конкурентлан тудо пошкудо Кужмарий ял гыч Валентина Ефремова ден Вера Мочаевам шотлен. «Воштылаш, товатат, сулык огыл!» конкурсыш каяш ямдылалтме годым эре шоненам: Кужмарий-шамыч ты ганат толыт мо? Нунын деч сайын выступатлаш, ой, чот неле вет», – шарналта Вера. А кызыт нуно, Окси ден Марпа (сценысе лӱмышт), кугу йолташ улыт. Ты весела вате-влак Веран концертыштыже эре мастарлыкыштым ончыктат, тений вӱдышӧ семын лектыч.
В.Гороховам Марий Эл Радион эртарыме концертлашке мыскараче вӱдышӧ семын ӱжыт. Вара «Чоным почын мурена» проект дене пырля районла мучко гына огыл, марий-влак илыме вес кундемлаштат лийын. А ӱмаште шошым йолташыже-влак дене пырля Йошкар-Олаште да республикысе райрӱдылаште шкенжын мыскара касше-влакым эртарен.
«Мый импровизацийым ышташ йӧратем. Сценыште лийше кеч-могай ситуацийым шканем кучылт кертам. Мутлан, зал гыч иктаж-кӧ иктаж-мом кычкыралеш гын, тунамак тудым шканем плюсыш савырем. Садлан сценыш лекташ лӱдмаш уке. Тыште мылам ласка», – ойла тудо.
Ирина СТЕПАНОВА.
В.Поликарповын фотожо.