«И КРАТКАЯ» II Йошкар-Оласе кинофестивальын жюри составым увертарыме. Тудо 19 гыч 22 сентябрь марте эрта.
Ты гана кинофестиваль Маргосфилармонийыште кумдан палыме шӱдыр-влакын ушнымышт дене торжественно почылтеш. А мероприятийым петырыме церемонийым Э.Сапаев лӱмеш Марий кугыжаныш опер да балет театрыште эртарат.
Кинофестивальын жюри председательже — режиссёр Борис Акопов («Бык», «На автомате», «Кэт»). Тыгак актрисе Светлана Камынина («Интерны», «Простые вещи», «Секреты семейной жизни»), актёр Никита Паршин («Молодёжка. Новый сезон», «Саня, газуй!», «Пять минут тишины»), регионысо кинематографийлан полшышо Фондын режиссёржо да генеральный продюсерже Элла Тухарели («Господин Великий», «Чужая земля»), М.Шкетан лӱмеш Марий кугыжаныш драмтеатрын художественный вуйлатышыже Василий Пектеев.
Почётан уна-влак Россий искусствын сулло деятельже, кинорежиссёр Андрей Эшпай да кинематографист-влак Ушем вуйлатышын икымше алмаштышыже Лариса Солоницына лийыт.
Фестивальыш 400 утла йодмаш пурен. Эн сайжым жюри кӱчык метражан фильм-влак коклаште – модмо, документальный да анимационный – палемдаш тӱҥалеш. Музыкальный оформитлымылан А.Я.Эшпай лӱмеш приз ышталтын. Посна номинаций – Эн сай «пеш кӱчык кино» верч.
«И КРАТКАЯ» кинофестивальын организаторжо-влак: Регионысо кинематографийлан полшымо фонд (ФПРК), Российысе кинематографист-влак ушем, «ФИЛДОК» да «ШАБЛИЙ» компаний-влак. Чылажат Марий Эл Правительствын да Республикысе тӱвыра, печать да калык-влакын пашашт шотышто министерствын полшымышт дене эрта.
«И КРАТКАЯ» кинофестиваль.