Университетым тунем пытарыме деч вара мый ик жап Москваште илышым да пашам ыштышым. Ик институтыш лаборанткылан пуренам ыле.
Пашаште чот ноялтын, шуко сомыл логалын. Мыланем эрдене 7 шагатат пелылан лабораторийыш миен шуман да студент-влак толмо жаплан чыла ямдылен шуктыман ыле.
Икана эрдене будильник йӱкеш помыжалтым, телевизорым чӱктышым, чайым йӱшемла, молгунамсе семынак увер аршашым ончышым. Погынымеке, уремыш лектын, автобусыш шинчым, вара расписаний почеш кайыше электричкыш куржын пурышым. Тыге пашашкем миен шуым. Ондаксе семынак. Но ты гана уремыште калыкын шагал улмыжо веле изиш ӧрыктарыш.
Институтыш миен шуаш тӱҥальым гын, ик тӧрзаштат тул огеш йӱлӧ, омсамат почмо огыл. Молгунам гын ты жапыште техничке-влак кӱварым мушкыт ыле, студент-влакат южышт толын шуыт. Вахте петырыме. Тыҥге-туҥге коштым да окнам тӱкалтышым. Мо тыгай, шонем.
Вахтёр омсам почо да вурседылаш тӱҥале: «Кум шагат эрдене мом перныл коштат? Ушет йӧршеш уке мо?» Мый аптыранен колтышым, ончальым гын: чынжымак 3 шагат эр веле. Тугеже кушеч автобус лектын, кушеч электричке? Телевизор денат молан эрдене ончыктымо передаче йӱдым кая? Ӧрмем дене мом вашешташат аптыранышым. Йӧра, вахтёр ты эрдене мыйым поктен ыш колто. Пуртыш, да лабораторийыштак эше кум шагат наре нералтышым. А мо тыгай лийын, молан 6 шагатлан шындыме будильникем йӱдым кычкырен – шкежат раш каласен ом керт. Теве тыгат лиеш южгунам.
Ирина.
Йошкар-Ола.
freepik сайт гыч налме фото.