Элыштына илыше ятыр еҥ СВО-лан кертмыж семын полшаш тырша. Кугу олаштат, изи ялыштат активист-шамычлан кӧра кугу паша шукталтеш. Параньга район Усола ялыште илыше волонтёр Галина Рублёван мӧҥгыштыжӧ маскироватлалтме сеткым пидме цехым организоватлен, тудо кок ий чоло пашам ышта.
Ӱшанле волонтёр
Тушко ялыште илыше кажне кумылан еҥ толын, пашашке ушнен кертеш. Кок ий утла жапыште Усола калык СВО-ш шуко сеткым колтен.
А шукерте огыл Г.Рублёвам активист-волонтёр семын поро пашам шуктымыжлан да СВО-лан полшен шогымыжлан Марий Элым Вуйлатышын тауштымашыж дене палемденыт.
Тӱҥалтыште икте, весе, кумшо пошкудо сеткым пидаш кумылан лийын гын, кызыт ты сомылым утларакшым Галина ден Екатерина шуктат. Ӱдыр-влакын ойлымышт почеш, полшымаш нунылан куаным веле конда.
– Кажне полыш шӱм-чон вошт шукталтеш. Тыгодым кӧргыштӧ каласен моштыдымо шижмаш озалана. Шагал огыл жап ынде сеткым пидына, нойымаш нимынярат огеш палдырне. Мӧҥгешла, эшеат полшымо да полшымо веле шуэш. Тидлан ӱнарат эре улмо гай чучеш. Кеч тыге рвезе-шамычлан сеҥымашым лишемдаш полшена манын шонена, – чонжым почо Галина.
Толкын ушен
Шернур посёлкысо черке пелен «Сернурские масксети» волонтёр-влак толкын пашам шукертак ышта. Тудо рӱдылан шотлалтеш гын, укшлаже-шамыч тӱрлӧ вере вераҥыныт. Усоласе волонтёр-влак лачшым ик тыгай укшыжо улыт. Тыгак Кукнурышто, Элнетыште да моло вереат тыгай укш-влак поро пашам шуктат. Нуно тӱрлӧ йыжыҥым виктарат.
Сеткым пидме материалым волонтёр-влаклан рӱдӧ толкынышто ямдылат. А калык дене погымо да чумырымо гуманитарный полышым, мӧҥгешла, тышке конден пуат. Варажым тышеч нуным СВО-ш колтат. «Сернурские масксетин» волонтёржо-влак «Калык фронт» толкын да «За Марий Эл» фонд дене пеҥгыде кылым кучат.
– Кызытсе ситуаций ик шонымашан, полшаш кумылан еҥ-шамычым иквереш чумырен. Вет мушкындо вич парня гыч чумырга. Тидыже виян улмым ончыкта. Кунам мушкындо гай чумырген, меат поро пашам ыштена, тунам шуктымо сомылна лектышан лиеш, – мане волонтёр.
«Ме огыл гын, кӧ?»
Усола волонтёр-влакын паша лектышышт, чынжымак, куандарыше. Нуно «Ме огыл гын, кӧ?» девиз почеш сомылым шуктат. Тыгак шкеныштын флагышт, вургемышт, шевронышт улыт. Шевронышто тӱҥ толкынын лӱмжым ончыктымо да «Юмо арале» тамгам келыштарыме. Ты шевроным волонтёр-шамычын футболкыштышт, флагыштышт тыгак ончыктымо.
Сортам, выньыкым да молымат…
Ты кундемыште СВО-лан такшым тӱрлӧ семын полшат. Сеткым пидме деч посна ялысе волонтёр-шамыч Усола школ дене пырля салтак-шамычлан гуманитарный полышым погат. Тыгак йоча-шамыч окопысо сортам ямдылат, тулым ылыжташ шырпым ыштат. Верысе почтышто «Порылыкын корзиҥгажым» вераҥденыт. Тушко ялыште илыше кажне кумылан еҥ тӱрлӧ кочкыш сатум але кӱлешан арверым налын коден кертеш. Школ ден почто ты поро пашам пырля вораҥдарат. СВО-ш гуманитарный полышым погымо годым эн ончыч тунемше-шамычын школышто велыме сорташтым коробкаш шындат гын, вара кагаз картон дене леведын, ӱмбакше «Порылыкын корзиҥгаж» сатум оптат. Коробкам сайын упаковатлен, Г.Рублёвалан конден пуат. Тудо гуманитарный полышым фондыш наҥгая.
– Усола школышто йот йылмым туныктышо Жанна Аркадьевна Сунгурова ден труд урокым вӱдышӧ Вячеслав Яковлевич Кочергин сортам ямдылымылан вуйын шогат. Эртыше ийын, шыжым, школ директор Михаил Алексеевич Богданов деке полышым йодын миенам ыле. Тунемше-шамычым пӱгыльмым погаш йодынам. Нуно тореш лийын огытыл. Варажым школ шке ты пашам виктараш кумылаҥын.
Сортам ямдылаш парафин кӱлын. Тидланже ял калык дене оксам погенна. Молодёжь тунам мыланна тидын шотышто кугун полшен. Нунын деч шуко окса пурен. Йӱкшеммешке, меат сортам ямдылаш полшенна, кызыт утларакшым сеткым пидына, – палдарыш Г.Рублёва.
«Шочмо верын вийже»
Усолаште илыше волонтёр-шамыч ялысе калыкым СВО-лан полшаш тараташ тӱрлӧ акцийым эртарат. Теве икмыняр кече ончыч нуно «Шочмо верын вийже» акцийым увертареныт. Ты акций кышкарыште салтак-влаклан мончаш пураш выньыкым погат. Кажне кумылан еҥ куэ, тумо але лӱсан выньыкым конден кертеш. Тидын дене нуно салтак-шамычын кумылыштым нӧлташ, шочмо кундем нерген ушештараш, капкылыштым вияҥдаш полшынена, маныт.
Волонтёр-шамыч приказ деч посна пашам ыштат. Кугу олаштат, изи ялыштат тыгай еҥ-шамыч чон йодмо сомылым шуктат. Уто мут да поро кумылышт дене салтакна-влакын сеҥымашым лишемдымашке кугу надырым пыштат.
Г.Рублёван архивше гыч налме фото-влак.