Йошкар-Олаште автомагистральым палемдыме деч ончычрак ыштен шуктышаш улыт.
2020 ий декабрьыште Марий Эл Республикым вуйлатыше Александр Евстифеев Россий Правительстве Председательын алмаштышыже Марат Хуснуллин дене вашлийын да «Безопасные и качественные автомобильные дороги» нацпроект почеш Киров ден Строитель-влак уремлам ушышо корным 2022 ийыште ыштен шукташ кутырен келшеныт.
Республикысе транспорт да корно озанлык министр Александр Герасименко пашам ыштыме радам дене палдарен. Тиде паша кок этаплан шелалтеш. 2021 ийлан ик миллиард оксам ойырат гын, 2022 ийлан – 760 миллион теҥгем.