Кодшо ийын лач тыгай программе дене Моркысо 1-ше номеран школыш англичан йылмым туныкташ С.П.Мерзлякова толын.
Татарстанысе Балтаси район Мельничная ялыште шочын-кушшо удмурт ӱдыр, Ципья школым пытарымеке, Ижевскысе педуниверситетыш тунемаш каен. 2014 ийыште удмурт да англичан йылмылам туныктышо специальностьым налын. Ижевскысе 40-ше номеран школышто туныкташ тӱҥалын.
– Тиде программе почеш пачерым налаш шонымашем шочын. Сандене, тушко логалаш манын, Татарстаныш, Пермь крайыш да Марий Элыш йодмашым колтенам. Марий кундемысе условий путырак келшен. Тыгак шочмо кундемышкем кудалышташ тора огыл. Мый тышке ӱдырем дене толынам. Тудлан вигак йочасадыште верым ойыреныт, а мыланем пачерымат муын пуэныт.
Финн-угор калык-влак дене кылдалтше мероприятий деч ончыч удмурт улмем йоча-влак пален огытыл, очыни. Нуным удмурт калык дене палдарышым, кочкышна, пайремна нерген каласкалышым, – мане Светлана Петровна.
Поро кумылан туныктышо чыла туныктышо коллективлан тауштыш да ончыкыжымат пашам оҥайын эртараш кумыл улмым палдарыш.