1943 ий 28 августышто Морко кундемын шочшыжо, йошкарармеец Василий Соловьёв Смоленск область Духовщинский район Жуково ял воктенысе кӱкшакаште Александр Матросовын подвигшым ыштен. Марий рвезе тушманын амбразуржым шке капше дене петырен. Тудын подвигше моло подразделений-влаклан ончыко каяш да кӱкшакам налаш йӧным пуэн. В.Соловьёвым патырлыкым да лӱддымылыкым ончыктымыжлан Совет Ушем Герой лӱм дене палемденыт.
Духовщине кундемыште илыше-шамыч Соловьёвын подвигшым да моло совет салтак-влакын тушман ваштареш талын шогымыштым тачат жаплат. Кажне ийын Сеҥымаш кече деч ончыч Герой-землякнан подвигым шуктымо кӱкшакам эрыктат, тӱрлӧ кушкылым шындат да пеледышым пыштат. Ты ганат администраций пашаеҥ, ший волонтёр, юнармеец да поро кумылан еҥ-влак суапле пашам ыштеныт. Вара Василий Соловьёвын подвигшым шарнен, митингым эртареныт.
Духовщинский муниципальный округ гыч колтымо фото-влак.