28 майыште Советский район Кукмарий ялыште библиотекын да тӱвыра пӧртын пашаеҥышт землякна, поэт-прозаик Г.А.Чемековын шочмо кечыжлан пӧлеклалтше шарнымаш мероприятийым эртареныт. Сылнымут мастарна ила гын, 83 ийым тема ыле.
Геннадий Александровичым поро мут дене шарналташ тудын йолташыже, пошкудыжо, палымыже да творчествыжым жаплыше еҥ-влак, тыгак тысе школышто тунемше-влак толыныт. Поэтын лӱмжым нумалше ялысе библиотеке пырдыжеш вераҥдыме мемориал оҥа йымалан пеледыш аршашым пыштеныт.
Погынышо-влак Геннадий Чемеков илымыже годым весела, пушкыдо кумылан, романтике шӱлышан, поро айдеме ыле манын палемденыт. Почеламутшо-влакым лудыныт, тудын мутшылан возымо мурым муреныт. Уста землякнан мутшылан возымо «Вуча арама», «Индеш шагатлан» да моло муро-влакым калык тачат мура. Тыгак организатор-влак поэтлан пӧлеклалтше стендым сӧрастареныт. Тушто Г.Чемековын книгаже, тӱрлӧ ийласе фотографий, тудлан возымо серыш-влак, савыкташ ямдылыме шуко рукописьше ончыкталтыныт.
Поэт пытартыш кечыже марте возен шоген, книгамат савыкташ шонен улмаш, но 2005 ийыште ӱмыржӧ кӱрылтын. Волгыдо, шыргыжалше чурийжым шарнен илена.
Иван Мамаев.
Советский район.
