3 апрельыште «НТВ» канал дене «Своя игра» модышышто Йошкар-Олаште шочшо Станислав Ельцов сеҥыш.
Тудын ачаж ден аваже эргыштын изиж годымак Норильскыш илаш кусненыт. Кызыт 33 ияш Станислав Александрович «Норильский никель» заводышто энергетиклан пашам ышта.
– Мый улыжат училищым веле тунем лектынам. «Своя игра» модышыш ойырышо-влаклан лач тиде фактше оҥай чучын, – манеш тудо. – Тыге лекте: кыдалаш технический образованиян еҥ ты модышын легендыже Александр Успановым сеҥен. Вӱдышат ӧрын: вет 25 модышышто участвоватлыше Александрын 12 сеҥымашыже уло, пелашыжат турнирыште модеш. Тыгай сеҥымашланак кӧра нуно пачерымат налын кертыныт.
Финальный раундышто С.Ельцов ден А.Успановлан Чукоткышто илыше журналист Юрий Рытхэун псевдонимжым палаш кӱлын. Тудым Станислав пален нале, Корней Чукотский мане. Ты йодышым землякна ик эн нелылан шотлен, но тудым ала-кунам лудмыжым шарналтен. Аукционышто вургем мушмо машина нерген йодышым эн куштылгылан шотла.
С.Ельцов 15800 балл дене сеҥен да «Золотая девятка» манме модышысо участник-влак коклашке логалын. Икымше модышыштак! Лишыл жапыште тудын модмыж дене эше ик «Своя игра» модыш эфирыш лекшаш.
– Школышто йӧратыме предметем историй лийын. А 14 ияш годсек финн-угор да марий калыкын историйже нерген лудам. Шке тукымемын эрык верч кучедалмышт нерген марий историк-влак дене Интернетыште мутланем, – каласыш землякна.
Станиславын кум ияш эргыже кушкеш. Аваж дене ойырленыт, сандене нунышт Йошкар-Олаште илат. Туге гынат икте-весышт дене кылым кучат.
С.А.Ельцовын аваже Алевтина Алексеевна Круковская марла ок кутыро гынат, марий калыкын чапшым тӱрлӧ мероприятийыште арала. Национально-культурный автономийыште пашажым аклен, 2018 ийыште Норильск олан мэрже олалан 65 ий темме пайремыште Алевтина Алексеевналан юбилейный медальым кучыктен.
Эльвира Терентьева.